အစိုးရအငှားအိမ်ရာ၌ နေထိုင်ခွင့်ရမည်ဟု မက်လုံးပေး လိမ်လည်သူများရှိနေ
ရန်ကုန်၊ မတ် ၁၈
ဆောက်လုပ်ရေးဝန်ကြီးဌာန၊ မြို့ပြနှင့် အိမ်ရာဖွံ့ဖြိုးရေးဦးစီးဌာနမှ စီမံခန့်ခွဲနေတဲ့ ရန်ကုန်တိုင်းဒေသကြီး၊ ဒဂုံမြို့သစ်တောင်ပိုင်းက သုခဒဂုံပြည်သူ့အငှားအိမ်ရာမှာ မသမာသူအချို့ကနေ အခန်းနေထိုင်ခွင့်ရမယ်လို့ မက်လုံးပေးပြီး ငွေတောင်းခံ လိမ်လည်နေကြောင်း အိမ်ခန်းနေရာချထားရေးနှင့် စည်းကမ်းထိန်းသိမ်းရေးကော်မတီက အသိပေးလာပါတယ်။
ဒါ့ကြောင့် မက်လုံးပေးတဲ့ ငွေကြေးလိမ်လည်တောင်းခံမှုတွေကို သတိပြုကြဖို့ အသိပေးထားပြီး အငှားအိမ်ရာမှာ နေရေးအခက်အခဲရှိသူတွေကို ၅ နှစ် ငှားရမ်းနေထိုင်ခွင့်ပြုထားတယ်လို့ ဆိုပါတယ်။
ငှားရမ်းနေထိုင်ခွင့်ရရှိသူအချို့ကလည်း ကိုယ်တိုင်နေထိုင်ခြင်းမပြုဘဲ တစ်ဆင့်ငှားရမ်းခြင်း၊ လွှဲပြောင်းခြင်းတွေ ဆောင်ရွက်နေတာကို သိရှိရပါက အိမ်ခန်းငှားရမ်းခွင့်ကို ရုပ်သိမ်းပြီး ဥပဒေနဲ့အညီ အရေးယူဆောင်ရွက်မယ်လို့ ထုတ်ပြန်ပါတယ်။
ကော်မတီဘက်ကလည်း ငှားရမ်းနေထိုင်ခွင့်ရရှိသူနဲ့ အိမ်ခန်းစာချုပ်ပါ နေထိုင်ခွင့်ရရှိသူမှအပ အခြားသူများကို နေထိုင်ခွင့်ပြုမထားဘဲ ထပ်ဆင့်ငှားရမ်းခြင်း၊ လွှဲပြောင်းငှားရမ်းခြင်းတွေ ဆောင်ရွက်ခွင့် ကန့်သတ်ထားပါတယ်။
ဒါ့အပြင် အိမ်ခန်းကို လွှဲပြောင်း၊ ရောင်းချ၊ ပေါင်းနှံခြင်းမပြုရလို့ အသိပေးထားပြီး ကိုယ်တိုင်နေထိုင်ခြင်းမပြုဘဲ အခန်းပိတ်မထားရလို့ စည်းကမ်းချက် ထုတ်ပြန်ထားပါတယ်။
သုခဒဂုံပြည်သူ့အငှားအိမ်ရာအတွင်း မကြာမီ ထပ်မံပြီးစီးမယ့် တိုက် ၅ လုံးကိုလည်း မဲနှိုက်ကာ နေရာချထားပေးမယ်လို့ အသိပေးထားပါတယ်။
လက်ရှိမှာ အိမ်ရာအတွင်းမှာ နေရေးအခက်အခဲရှိသူတွေ၊ အငြိမ်းစားဝန်ထမ်းတွေ၊ လက်ရှိတာဝန်ထမ်းဆောင်ဆဲ နိုင်ငံ့ဝန်ထမ်းတွေကို သတ်မှတ်ငှားရမ်းခနှုန်းထားနဲ့ ငှားရမ်းနေထိုင်ခွင့်ပြုထားပါတယ်။
သတင်း - BETV Business