CMP လုပ်ငန်းသို့ ဝင်ရောက်သည့် နိုင်ငံခြားငွေမှ ဒေါ်လာ ၂.၂ သန်းခန့် ဗဟိုဘဏ် နေ့စဉ် ထုတ်ရောင်းပေးနေ
- စက်သုံးဆီလုပ်ငန်းရှင်များထံ ဒေါ်လာ ၃၃ သန်း ရောင်းချပေးမည်
ရန်ကုန်၊ မတ် ၁၈
ပြည်တွင်းမှာ ကုန်ကြမ်းယူ ကုန်ချောပေး (Cutting, Making, Packaging - CMP) လက်ခစားစနစ်နဲ့ ချုပ်လုပ်တဲ့ အထည်တွေကို ပြည်ပတင်ပို့မှုမှ ပြန်လည်ဝင်ရောက်လာတဲ့ နိုင်ငံခြားငွေတွေကို နေ့စဉ်ထုတ်ရောင်းပေးနေကြောင်း မြန်မာနိုင်ငံတော်ဗဟိုဘဏ်က ထုတ်ပြန်လာပါတယ်။
နိုင်ငံခြားငွေကြေးဈေးကွက် (FX Trading Platform) ကနေ CMP လုပ်ငန်းတွေကို ဝင်ရောက်တဲ့ နိုင်ငံခြားငွေမှ တစ်ရက်ကို ပျမ်းမျှ အမေရိကန်ဒေါ်လာ ၂.၂ သန်းခန့် နေ့စဉ်ရောင်းချပေးနေတာလို့ ဆိုပါတယ်။
အဆိုပါ နိုင်ငံခြားငွေတွေကို စက်သုံးဆီနဲ့ အခြားကုန်စည်တွေ တင်သွင်းတဲ့ လုပ်ငန်းရှင်များအတွက် ရည်ရွယ်ရောင်းချတာလို့လည်း ဗဟိုဘဏ်ရဲ့ ထုတ်ပြန်ချက်မှာ ဖော်ပြထားပါတယ်။
ဗဟိုဘဏ်အနေနဲ့ FX Trading Platform ကနေ စက်သုံးဆီလုပ်ငန်းရှင်တွေကို အမေရိကန်ဒေါ်လာ ၃၃ သန်း ရောင်းချပေးမယ်လို့ မတ်လ ၁၇ ရက်နေ့က ကြေညာထားပါတယ်။
ရောင်းချပေးမယ့် နိုင်ငံခြားငွေအတွက် သတ်မှတ်ငွေလဲနှုန်းကို သီးခြားဖော်ပြထားခြင်း မရှိတာကို ဗဟိုဘဏ်ရဲ့ ထုတ်ပြန်ချက်အရ သိရပါတယ်။
မတ်လ ၁၇ ရက်နေ့မှာ FX Trading Platform အတွင်း အမေရိကန်ဒေါ်လာငွေလဲနှုန်းအဖြစ် ၃၅၉၆ ကျပ်၊ တရုတ်ယွမ်ငွေလဲနှုန်းအဖြစ် ၅၄၂ ကျပ်၊ ထိုင်းဘတ်ငွေလဲနှုန်းအဖြစ် ၁၃၀.၃ ကျပ်နဲ့ အိန္ဒိယရူပီးငွေလဲနှုန်းအဖြစ် ၄၃.၆၀ ကျပ် သတ်မှတ်ခဲ့ပါတယ်။
ပြည်တွင်းဘဏ်တွေရဲ့ နိုင်ငံခြားငွေအရောင်းအဝယ်ကိုကြည့်ရင် ငွေလဲနှုန်း ၂၁၀၀ - ၄၄၇၀ ကျပ်အတွင်းမှာ အမေရိကန်ဒေါ်လာ ၃၀.၂၈၃ သန်းကျော် ဘဏ်တွေနဲ့ ဝယ်ယူသူတွေကြား ရောင်း/ဝယ် ဖြစ်ခဲ့ပါတယ်။
ဘဏ်တွေ အချင်းချင်းကြားမှာတော့ ဒေါ်လာငွေလဲနှုန်း ၂၁၀၃ - ၄၅၀၀ ကျပ်အတွင်းမှာ အမေရိကန်ဒေါ်လာ ၄.၆၁၉ သန်းကျော် ရောင်း/ဝယ် ဖြစ်ခဲ့တာကို တွေ့ရှိရပါတယ်။
