#ပြည်တွင်းသတင်း
◼မြဝတီ၌စက်သုံးဆီမှောင်ခို အပြိုင်အဆိုင်ရောင်းချမှုကြောင့် စက်သုံးဆီစျေးအနည်းငယ်ကျဆင်း
မြဝတီမြို့အတွင်း၌ စက်သုံးဆီမှောင်ခိုစျေးကွက် အပြိုင်အဆိုင်ရောင်းချမှုကြောင့်စက်သုံးဆီတစ်လီတာကို ကျပ် ၉၀၀၀ ထိကျဆင်လာကြောင်း မြဝတီမြို့နယ်မှ ဒေသခံများကပြောသည်။
မြဝတီမြို့အတွင်း၌လက်ရှိစက်သုံးဆီအရောင်းဆိုင်များတွင် စက်သုံးဆီမရှိတော့သည့်အတွက် ဆိုင်များပိတ်ထားကြောင်း၊ လက်ရှိ ဆီမှောင်ခိုရောင်းချနေသည့်စက်သုံးဆီဆိုင်များ ပေါများလာပြီး အပြိုင်အဆိုင်ရောင်းချနေသည့်အတွက် ယခင်က စက်သုံးဆီတစ်လီတာကို ကျပ် ၁၅၀၀၀ မှ ကျပ်တစ်သောင်း၊ ယခုကျပ် ၉၀၀၀ ထိကျဆင်းလာကြောင်းသိရသည်။
"လက်ရှိကားသမားအချို့ကလည်းဆီဆိုင်၊ ဆိုင်ကယ်ကယ်ရီသမားကလည်း ဆီဆိုင်တွေလမ်းဘေးမှာ အပြိုင်ဖွင့်ကြတော့ မြဝတီမြို့မှာ အခုအများဆုံးဆိုင်ကဆီဆိုင်တွေပဲ။ ဒါပေမဲ့ ဘယ်လိုဘဲဖြစ်ဖြစ်ပါ။ ဆီစျေးတွေအခုလိုကျအောင်ဖန်တီပေးပြီး အပြိုင်ရောင်းနေတဲ့မှောင်ခိုစျေးကွက်က သူတွေကိုကျေးဇူးတင်ရမှာပါ။ လက်ရှိဆီဆိုင်တွေလည်းမဖွင့်တော့ပါဘူး။ ရောင်းစရာလည်းဆီမရှိတော့ပါဘူး။ အခုကဆီလုပ်တဲ့သူတွေက သူတို့ကားတွေနဲ့တခြားနေရာတွေမှာဆီသွားဝယ်တဲ့အခါ တစ်ပိုင်းတစ်နိုင်သယ်လာပြီး မြဝတီမှာပြန်ရောင်းကြတယ်။ အဲဒီလိုလုပ်တဲ့သူတွေများလာတော့ဆီစျေးတွေကကျလာတာပါ။ နောက်ထပ်လည်းကျဖို့ရှိပါတယ်"ဟု မြဝတီမြို့ ဒေသခံတစ်ဦးကပြောသည်။
ထိုင်းနိုင်ငံဘက်မှ မြန်မာနိုင်ငံနယ်စပ် မြဝတီမြို့အား လျှပ်စစ်မီးဖြတ်တောက်လိုက်သည့်အပြင် စက်သုံးဆီတင်သွင်းမှုကိုပါ ရပ်ဆိုင်းလိုက်သဖြင့် မြဝတီမြို့အတွင်း စက်သုံးဆီပြတ်လပ်ပြီး တစ်လီတာကို ကျပ် ၁၅၀၀၀ ထိမြင့်တက်ခဲ့သည့်အပြင် လိုသလောက်ဝယ်ယူ၍မရခဲ့ကြောင်းသိရသည်။
သတင်း - ပိုင်လေး
ဓာတ်ပုံ - ဘီဝမ်း(ပုံဟောင်း)
