ဒေါ်လာ ၃ သိန်းတန် အမေရိကန်ထုတ် မိုးပျံကား လူပြောများနေ
မိုးပျံကားတွေက ရုပ်ရှင်မဆန်တော့ဘဲ ရောင်းကုန်အဖြစ် မြင်ရတော့မှာပါ။
ဒီတစ်ပတ်ထဲမှာပဲ အမေရိကန်ကားကုမ္ပဏီတစ်ခုက မိုးပျံကားမော်ဒယ်တစ်မျိုးကို ကယ်လီဖိုးနီယားလမ်းတွေပေါ်မှာ စမ်းသပ်ပျံသန်းခဲ့ပါတယ်။ Alef Aeronautics ရဲ့ မိုးပျံကားစမ်းသပ်ပျံသန်းတဲ့ ဗွီဒီယိုဖိုင်က လူမှုကွန်ရက်မှာ နာမည်ကြီးသွားပါတယ်။
ဗွီဒီယိုထဲမှာ မြင်ရသလောက်တော့ Alef Model Zero က အမြင့်ကြီး ပျံတာမျိုး မဟုတ်ဘဲ ‌ကားတွေပေါ် ကျော်ပျံပြီး ဆင်းတက်တာမျိုး စမ်းပြထားတာ တွေ့ရပါတယ်။ ယာဉ်ကြောပိတ်တဲ့ လမ်းတွေမှာ အကျော်အခွလုပ်ပြီး ပျံလို့ ရမယ့် ကားမျိုးပါ။
concept ဒီဇိုင်းအနေနဲ့ ထွက်ထားတဲ့ မိုးပျံကားအတော်များများက ကားတစ်စင်းထက်စာရင် ဒရုန်းအကြီးစားနဲ့ တူပြီး ဒလက်တွေနဲ့ လာတာပါ။ တချို့လည်း တောင်ပံအခေါက်အသိမ်းလုပ်နိုင်တဲ့ ဒီဇိုင်းနဲ့ ကား-ယာဉ်ပျံနှစ်မျိုးစပ်တဲ့ ပုံစံ သုံးတာများပါတယ်။
Alef Model Zero ကတော့ ကားပိုဆန်ပြီး လျှပ်စစ်ဒလက်တွေနဲ့ ပျံသန်းမှာပါ။ နမူနာဒီဇိုင်းမှာတော့ နှစ်ယောက်စီးအနေနဲ့ ထုတ်ထားတာ ဖြစ်ပြီး နောက်ပိုင်း update လုပ်မယ့် မော်ဒယ်ကို autopilot mode ပါတဲ့ Alef Model A ဆိုပြီး နာမည်ပေးသွားမယ်လို့ ဆိုပါတယ်။
အခုမိုးပျံကားက မြေပေါ် မိုင် ၂၀၀ နဲ့ မိုးပေါ် မိုင် ၁၀၀ မောင်းနှင်နိုင်ပေမယ့် မြေပြင်ပေါ်တော့ တစ်နာရီ ၂၅ မိုင်ပဲ သွားနိုင်မယ်လို့ ပြောပါတယ်။ Alef Aeronautics က ဒီကားကို ဒေါ်လာ ၃ သိန်းဝန်းကျင်နဲ့ ရောင်းဖို့ လုပ်နေပြီး လောလောဆယ် အမှာစာ ၃၃၀၀ ရထားပါတယ်။
Model A မိုးပျံကားတွေကို ဒီနှစ်ကုန်ပိုင်းလောက်မှာ ထုတ်လုပ်သွားဖို့ ရှိပါတယ်။ နောက်ပိုင်းမှာတော့ Alef Model A အပြင် လေးယောက်စီးနိုင်ပြီး Model A ထက် နှစ်ဆပို ပျံသန်းနိုင်မယ့် Alef Model Z မော်ဒယ်ကိုလည်း ထုတ်လုပ်သွားဖို့ ရှိပါတယ်။