စွန့်လွှတ်ရခြင်းတွေမှာ ကျွန်တော်ပင်ပန်းလာပြီ ။
ဒီနှစ်တွေမှာ အဆင်မပြေတာတွေများတယ် ။ဘယ်တော့မှ ထွက်မသွားပါဘူးဆိုတဲ့ လူတစ်ယောက်က ကျွန်တော့်ဘေးနားက ထွက်ခွာသွားခဲ့ပြီဖြစ်သလို ကိုယ်အမြတ်နိုးဆုံးဆိုတဲ့ အရာတွေ အများကြီးကိုလဲ ဆုံးရှုံးခဲ့ရပြီးပြီလေ ။ ဘယ်သူမှ မသိအောင် မြိုသိပ်ထားရင်း နေခဲ့မိတာ တကယ်တမ်းကျတေုာ့ အဆင်တော့ သိပ်မပြေလှဘူး ။ ပြီးတော့ ကျွန်တော် စွန့်လွှတ်ရခြင်းတွေကို တဖြေးဖြေး မုန်းလာမိပြီ ။
တစ်ခါလောက်တော့ ... ကျွန်တော်ပိုင်ဆိုင်ချင်ခဲ့ဖူးတဲ့ အရာတွေကို ပိုင်ဆိုင်ချင်ဖူးတယ် ။ ဒါမှမဟုတ် မဆုံးရှုံးပဲ နေချင်ခဲ့ဖူးတယ် ။ မေတ္တာတွေများသွားရင် ဆုံးရှုံးသွားရတတ်မှန်း ကျွန်တော် အရင်က မသိတတ်ခဲ့ဘူး ။ သေသေချာချာ ဂရုစိုက်တယ် ပြီးတော့ သေသေချာချာ ပြုစုယုယခဲ့ဖူးတယ် ။ အစစအရာရာမှာ တန်ဖိုးထားဖြစ်ခဲ့သလို နေရာတကာမှာ အရာရာကို စိတ်နှစ်ကိုယ်နှစ်ခဲ့ဖူးတယ်လေ ။
ကျွန်တော် အမြတ်နိုးဆုံးအရာတွေကို တကယ်ပဲ ဆုံးရှုံးခဲ့ဖူးပါတယ် ။ အများကြီးမျှော်လင့်ထားခဲ့မိတာ ပြီးတော့ အများကြီး ပင်ပန်းထားခဲ့ရတာ ... ပြီးတော့ သေချာလေး ဂရုစိုက်ပေးခဲ့တာ ဒါပေမယ့် နောက်ဆုံးကျရင် ကိုယ်နဲ့ ဘာမှ မသက်ဆိုင်တော့သလိုမျိုး ကျွန်တော်က ကျန်ခဲ့ရတာပဲများတယ် ။ ဘာကြောင့်လဲဆိုတဲ့ အဖြေတွေ ရှာမရခဲ့သလို ဘာကြောင့်လဲဆိုပြီးလဲ မတွေးတတ်ခဲ့ဘူး ကျွန်တော်ဟာ ကွက်လပ်လေးတိုင်းကို လိုက်ဖြည့်ရသူသက်သက်လားလို့ တွေးမိတယ် ။ ဒါပေမယ့် အမြတ်နိုးဆုံးဆိုတဲ့ အရာတွေကိုလဲ ကျွန်တော်လဲ ပိုင်ဆိုင်ချင်ဖူးပါတယ် ။
ကျွန်တော် ... စွန့်လွှတ်ရခြင်းတွေကို အရမ်းပဲ မုန်းလာမိပြီ ။ ကျွန်တော် စွန့်လွှတ်ရခြင်းတွေမှာ တကယ်ပဲ ပင်ပန်းနေပြီ ပြီးတော့ ကျွန်တော် မြတ်နိုးပါတယ်ဆိုတဲ့ အရာကို တစ်ကြိမ်တစ်ခါလောက်ပဲ ဖြစ်ဖြစ် ပိုင်ဆိုင်ချင်ဖူးပြီ ။
#ကျေးကို
(ရင်နှင့်ရင်း၍ရေးသည်)
