#ယနေ့ထုတ်သတင်းစာ_သတင်း
◼ မိုးကြို ချည်မျှင်ရှည်ဝါစိုက်တောင်သူများသို့ကြိုတင်ဆောင်ရွက်ရမည့် အချက်များ ထုတ်ပြန်
မိုးကြိုချည်မျှင်ရှည်ဝါကို ဖေဖော်ဝါရီ လလယ်မှ စတင်စိုက်ပျိုးသည့်အတွက် စိုက်တောင်သူများသို့ ကြိုတင်ဆောင်ရွက်ရမည့် အချက်များကို ဝါနှင့်လျှော်မျှင်ထွက်သီးနှံ ဌာနခွဲ စိုက်ပျိုးရေးဦးစီးဌာနက ထုတ်ပြန်ခဲ့သည်။
အဆိုပါအချက်များမှာ မျိုးအနေဖြင့် မိုးကြိုချည်မျှင်ရှည်ဝါကိုအချိန်မီစိုက်ပျိုးနိုင်ရေးအတွက် စိုက်ပျိုးရေးဦးစီးဌာနဝါနှင့် လျှော်မျှင်ထွက်သီးနှံဌာနခွဲမှ ထုတ်လုပ်ဖြန့်ဖြူးလျက်ရှိသော ငွေချည် ၆၊ ရွှေတောင် ၈၊ ငွေ ချည် ၉၊ ရွှေတောင် ၁ဝ၊ ငွေချည် ၁၁ ဝါမျိုးစေ့များအား ကြိုတင်ဝယ်ယူ စုဆောင်းထားရန်၊ မျိုးကွဲလုံးဝကင်းစင်ပြီး အပင်ပေါက်ရာခိုင်နှုန်း ၈ဝ အထက်ရှိ အရည်အသွေးမြင့် မျိုးဝါစေ့များကိုသာ အသုံးပြုစိုက်ပျိုးနိုင်ရေးအတွက် ကြိုတင်စုဆောင်းထားရန်၊ မျိုးစေ့များ ခြောက်သွေ့ရန်အတွက် နေ နှစ်ကြိမ်၊သုံးကြိမ်လှန်းပြီးမှ ဂုန်နီအိတ်တွင်ထည့်၍ ရေမစိုနိုင်သောနေရာတွင် ကတ်များခင်းပြီး သိုလှောင်ထားရန်တို့ဖြစ်သည်။
ယင်းပြင် မြေအနေဖြင့် မိုးကြိုချည်မျှင်ရှည်ဝါကို အချိန်မီ စိုက် ပျိုးနိုင်ရေးအတွက် ရှေ့သီးနှံများ အချိန်မီဖယ်ရှားရေး၊ အချိန်မီ မြေပြုပြင်ပြီးစီးရေး၊ စိုက်ပျိုးချိန်တွင် ရေအပြည့်အဝ ပေးသွင်းရရှိရေးတို့အတွက် ကြိုတင်အစီအစဉ်များ ရေးဆွဲဆောင်ရွက်ရန်၊ မြေဆီဩဇာ သင့်တင့်ကောင်းမွန်ပြီး အစိုဓာတ် ထိန်းသိမ်းမှုနှင့် လေဝင်လေထွက်ကောင်းသော နုန်းမြေ၊ နုန်းစနယ်မြေနှင့် သဲနုန်းမြေများကို ရွေးချယ်စိုက်ပျိုးရန်၊ ပေါင်းမြက်ကြိုတင်ကာကွယ် နှိမ်နင်းရေးအနေဖြင့် ရှေ့သီးနှံ (ဥပမာ-စပါး)ရိတ်သိမ်းပြီးသည်နှင့်တစ်ပြိုင်နက် မြေမစိုလွန်း၊ မခြောက်လွန်းရှိမည့်ပပ်ကြားအက်စအချိန်တွင် ပထမ ထယ်တစ်စပ်ထိုးရန်နှင့် အခြောက်လွန်သွားသော စိုက်ခင်းတွင် ရေစပ်ရုံမျှသွင်းပြီး မြေအထန့်တွင် ထယ်ထိုးရန်၊ မိုးနှောင်းချည်မျှင်ရှည်ဝါအပြီး မိုးကြိုဝါဆက်လက်စိုက်ပျိုးမည့် စိုက်ခင်းများတွင် ဝါကို နောက်ဆွဲကောက်သိမ်းခြင်းဖြင့် စိုက်ခင်းများအတွင်း ပေါင်းပင်များအစေ့တည်ပြီး ရင့်မှည့်လာနိုင်သောကြောင့် ပေါင်းပင်များကို ဆက်လက်ရှင်သန်ခွင့်မပေးဘဲ ထယ်ထိုးပေါင်းသတ်ထားရန် တို့ဖြစ်ကြောင်းသိရသည်။
ထို့နောက် စိုက်ထယ်ရေး မပြုလုပ်မီအချိန်အတွင်း ၁၆ သွား ထွန် တစ်စပ် သို့မဟုတ် နှစ်စပ်ဝင်ပြီး ပေါင်းသတ်ထွန်ရေး ပြုလုပ်ထားရန်၊ အသုံးပြုမည့်ထယ်၊ ထွန်၊ ကြားတိုက်ကိရိယာများတွင် ပေါင်းစေ့များ တွယ်ကပ်မှု မရှိစေရန် ကောင်းစွာသန့်ရှင်းပြီးမှ အသုံးပြုရန်၊ မိုးကြိုချည်မျှင်ရှည်ဝါသည် ရေသွင်းစိုက်ပျိုးသည့် သီးနှံဖြစ်သည့်အလျောက် ရေသွင်းမြောင်းများ သန့်ရှင်းရေးကို ကြိုတင်ဆောင်ရွက်ထားရန်၊ ကောင်းစွာဆွေးမြည့်သော နွားချေးနှင့် သဘာဝမြေဩဇာများကိုသာ သုံးစွဲရန်၊ အကယ်၍ ပေါင်းသတ်ထွန်ရေး မပြုလုပ်နိုင်ခဲ့လျှင်သော်လည်းကောင်း၊ ပေါင်းသတ်ထွန်ရေး ပြုလုပ်သော်လည်း ပေါင်းမြက်များ ဆက်လက်ကျန်ရှိနေလျှင် သော်လည်းကောင်း၊ အထူးသဖြင့် မြေစာမြက်ကဲ့သို့သော နှစ်ရှည်ခံပေါင်းမြက်များ ပေါက်ရောက်မှုထူထပ်လျှင်သော်လည်းကောင်း အစိုဓာတ်သင့်တင့်စွာ ရှိချိန်ဝါမစိုက်ပျိုးမီ အနည်းဆုံး ၂ဝ၊ ၂၅ ရက် ကြိုတင်၍ပေါင်းသတ်ဆေး ပက်ဖျန်းပေါင်း သတ်ထားရန်တို့ဖြစ်ကြောင်း သိရသည်။
