နှစ်ဦးသဘောတူနေ့စွဲများ
မြင်မြင်ချင်း တစ်ယောက် ဘဝထဲ တစ်ယောက်
လေးလေးနက်နက် နစ်မြှုပ်ခဲ့ကြ
တွေ့တွေ့ချင်း တစ်ယောက် အာရုံထဲရှိတာ တစ်ယောက်
အလိုအလျောက် သိမြင် နားလည်ခဲ့ကြ
တစ်ယောက် ရင်ဘတ်ကို တစ်ယောက်
ဓားနဲ့ပေါက် လက်တည့်စမ်းခဲ့ကြ
စိတ်ကူးယဉ် ကိတ်မုန့်တစ်လုံးကို
အတူဖုတ်ပြီး မက်မက်မောမော စားခဲ့ကြ
ကျေနပ်ခြင်း သီးစုံဖျော်ရည် တစ်ခွက်ကို
အတူဖျော်ပြီး အငမ်းမရ မော့သောက်ခဲ့ကြ
ပင်စည်တစ်ခုပေါ်မှာ ပိုးမွှားတွေလို တွယ်ကပ်
ပြင်းပြတဲ့ တပ်မက်ခြင်းတွေနဲ့ အတူတကွ ရှင်သန်ခဲ့ကြ
တစ်ယောက် အိပ်မက်ကို တစ်ယောက် ဖောက်ထွင်း
ငြိမ်သက်ခြင်း ကြမ်းပြင်ပေါ်မှာ ပင့်သက်တွေ ပစ်ချခဲ့ကြ
တစ်ယောက် မျက်လုံးထဲ တစ်ယောက် ပြေးဝင်
ပွင့်ပွင့်လင်းလင်း ချင်ခြင်းတပ်ခဲ့ကြ
တစ်ယောက် မနက်ဖြန်ကို တစ်ယောက် စာချုပ်
မမြင်ရတဲ့ အချိန်ကာလကို ဖမ်းဆုပ်ခဲ့ကြ
ပြန်စဉ်းစားကြည့်တော့
နောက်ကျနေတဲ့ ရထားပေါ်မှာ ကြင်ကြင်နာနာ ပြစ်မှား
တစ်ယောက်နဲ့ တစ်ယောက် ပစ္စလက်ခတ် အသားချင်း ထိမိခဲ့ကြ
ရေစီးသန်တဲ့ မြစ်ကို စွန့်စွန့်စားစား ကူးဖြတ်
တစ်ယောက် အတ္တကို တစ်ယောက် ကြက်ခြေခတ်မိခဲ့ကြ
ရှုပ်ထွေး ကောက်ကွေ့လွန်းတဲ့ လောကအလယ်
တစ်ယောက်နဲ့ တစ်ယောက် မိုက်မိုက်ကန်းကန်း ငြိတွယ်မိခဲ့ကြတာ
ဘာများ ဆန်းကြယ်လို့လဲကွယ် ။
-လှသန်း
