#နိုင်ငံတကာသတင်း
◾️ယူကရိန်းအရေးအတွက် ဥရောပခေါင်းဆောင်များ အရေးပေါ်အစည်းအဝေးပြုလုပ်မည်
ယူကရိန်းပဋိပက္ခအပေါ် ဒေါ်နယ်ထရန့်၏ တစ်ကိုယ်တော်ကိုင်တွယ်မှုကို အခိုင် အမာ တုံ့ပြန်ရန် ဥရော က ကြိုးစားနေစဉ်မှာပင် ယူကရိန်းစစ်ပွဲ နှင့် ဥရောပလုံခြုံရေးကို ဆွေး နွေး ရန် ဥရောပခေါင်းဆောင်များ၏ ထိပ်သီးအစည်းအဝေးကိုလက်ခံ ကျင်းပ သွားမည် ဖြစ်ကြောင်း ပြင်သစ်နိုင်ငံက ပြောကြားသည်။
ကိဗ် အတွက် လုံခြုံရေးနှင့်ပတ်သက်၍ ၎င်းတို့ပေးအပ်နိုင်မည့် အာမခံချက်များ အကြောင်း မေးမြန်းထားသော မေးခွန်းများကို ဝါရှင်တန်က ဥရောပအစိုးရများထံ ပေးပို့ခဲ့ပြီးနောက် ယူကရိန်းငြိမ်းချမ်းရေးဆွေးနွေးပွဲတွင် ဥရောပအတွက်နေရာ မရှိကြောင်း ထရန့်၏ ယူကရိန်းအရေးအထူးကိုယ်စားလှယ် ကိသ်ကဲလော့ဂ် က စနေနေ့တွင် ပြောကြားခဲ့သည်။
ထို့နောက်ဥရောပလုံခြုံရေးနှင့်ပတ်သက်၍ ဆွေးနွေးရန် ပြင်သစ်သမ္မတ အီမန်နျူယယ် မက်ခရွန် က အဓိကဥရောပနိုင်ငံများနှင့် တွေဆုံသွားမည်ဖြစ်ကြောင်း ပြင်သစ်နိုင်ငံခြားရေး ဝန်ကြီး ဂျင်နိုဝယ်ဘာရော့က ပြင်သစ် အင်တာ ရေဒီယိုအားပြောကြားသည်။
ယင်းအစည်းအဝေးသို့ ဗြိတိန်ဝန်ကြီးချုပ် ကီယာစတာမာ ၊ ဂျာမနီအဓိပတိ အိုလဖ်ရှိုးဇ် ၊ နေတိုးအတွင်းရေးမှူးချုပ် မာ့ခ်ရူတဲ ၊ ဥရောပကော်မရှင်ဥက္ကဌ အာဆူလာဗွန်ဒါလီယန်း တို့ တက်ရောက်ကြမည်ဖြစ်ကြောင်း ပြင်သစ်သမ္မတရုံးက ပြောကြားသည်။
ထို့ပြင်အီတလီ ၊ ပိုလန် ၊ စပိန် ၊ နယ်သာလန် နှင့် ဒိန်းမတ်ခေါင်းဆောင်များလည်း တက်ရောက်ကြမည်ဟု ပြင်သစ်သမ္မတရုံးက ယမန်နေ့က ထပ်မံပြောကြားသည်။
မော်စကို က အိမ်နီးချင်း ယူကရိန်းကို ကျူးကျော်ခဲ့ပြီးနောက်ပိုင်း အလားတူထိပ်သီးအစည်းအဝေးများကို ဥရောပကို အကြိမ်များစွာကျင်းပခဲ့သော်လည်း ယူကရိန်းစစ်ပွဲအဆုံးသတ်ရေး ၊ ရုရှားနိုင်ငံနှင့်ဆက်ဆံရေး တို့နှင့်ပတ်သက်၍ နိုင်ငံရေးအားနည်းမှု ၊ တစ်ခါတစ်ရံ စည်းလုံးညီညွတ်မှုမရှိခြင်း နှင့် စည်းစည်းလုံးလုံးရှိသော အစီအစဉ်များကို ပြသရန် ရုန်းကန်နေခဲ့ရကြောင်း သတင်းက ဖော်ပြသည်။
ယခုထိပ်သီးအစည်းအဝေးတွင် ယူကရိန်းအား ချက်ချင်းမည်သို့ ကူညီနိုင်မည် ၊ ကိဗ်အတွက် လုံခြုံရေးအာမခံချက် ပေးရာတွင် ဥရောပက မည်သို့သောအခန်းကဏ္ဍမှ ပါဝင်နိုင်သည်နှင့် ဥရောပအတွက် အားလုံးပါဝင်သည့် လုံခြုံရေးကို တောင့်တင်းအောင် လုပ်ဆောင်ရေးကိစ္စရပ်များကို အဓိကထား ဆွေးနွေးကြမည်ဖြစ်ကြောင်း ဥရောပသံတမန်များက ပြောကြားကြသည်။
