Xiaomi သူဌေး တရုတ်အချမ်းသာဆုံး ၅ ဦးမှာ ပါဝင်လာ
ကိုယ့်ဒူးကိုယ်ချွန်နဲ့ ချမ်းသာလာတဲ့ တရုတ်သူဌေးတွေထဲမှာ Xiaomi CEO ကလည်း အတော်လေးစားဖို့ကောင်းပါတယ်။
ဟူဘေးအစွန်အဖျားက ကျောင်းဆရာမိဘတွေကနေ လူဖြစ်လာပြီး ကမ္ဘာ့တတိယအကြီးဖုန်းကုမ္ပဏီကို ထောင်နိုင်ခဲ့တဲ့ လေဂျန်က အခု တရုတ်ရဲ့ ၅ ဦးမြောက် အချမ်းသာဆုံးနေရာ ရောက်လာပါတယ်။
လေဂျန်ကို မနှစ်နှစ်န်းက ဒေါ်လာ ၁၀.၉ ဘီလျံ ချမ်းသာတယ်လို့ Forbes က ထုတ်ပြန်ခဲ့ပါတယ်။ အခု Forbes ရဲ့ အစီရင်ခံစာမှာ လေဂျန်ရဲ့ ကြွယ်ဝမှုက ဒေါ်လာ ၃၅.၃ ဘီလျံရှိတယ်လို့ ဆိုပါတယ်။ တစ်နှစ်မပြည့်ခင် ၃ ဆကျော်လောက် ချမ်းသာလာတာပါ။
Xiaomi ရှယ်ယာတန်ဖိုး ၁၂ လအတွင်း ၂၅၀% ခုန်တက်သွားတဲ့နောက် အခုလောက်အထိ တဟုန်းထိုး ချမ်းသာလာတာလို့ ဆိုပါတယ်။ Xiaomi ရဲ့ အမြတ်အစွန်းများတဲ့ တန်းမြင့်ဖုန်းတွေ ရောင်းအားပိုကောင်းလာတာလည်း တစ်ချက်ပါ။
ဒီထက်ပို စိတ်ဝင်စားဖို့ကောင်းတာက Xiaomi ရဲ့ EV ကားစီးပွားရေးသစ် ဖြစ်ပါလိမ့်မယ်။ မနှစ်က Xiaomi လျှပ်စစ်ကားတင်ပို့မှုက အစီးရေ ၁၃၅၀၀၀ ကျော် သွားခဲ့ပါတယ်။ EV ထဲ အခုမှ ဝင်လာတဲ့ Xiaomi ရဲ့ ကားစီးပွားရေးက ကြမ်းတယ်လို့ ပြောရမှာပါ။
ဒီနှစ် EV ကားရောင်းအားပစ်မှတ်ကို Xiaomi က မနှစ်ကထက် နှစ်ဆကျော်တင်ပြီး ကားအစီးရေ ၃ သိန်းအထိ တင်ပို့နိုင်ဖို့ မှန်းထားပြီး ရင်းနှီးမြှပ်နှံသူတွေကလည်း ဒီအပေါ် အကောင်းမြင်နေကြပါတယ်။ အခုလဆန်းပိုင်းကပဲ Xiaomi က သူ့ရဲ့ flagship EV မော်ဒယ် SU7 Ultra အစီးရေ ၁ သောင်း ရောင်းချဖို့ ပြင်နေတယ်လို့ ပြောထားပါတယ်။
တရုတ်သူဌေးလောကမှာ အချမ်းသာဆုံးက အဖျော်ယမကာလုပ်ငန်းကုမ္ပဏီ Nongfu Spring ပိုင်ရှင် ကျုံ ရှန်ရှန်းဖြစ်ပြီး ဒေါ်လာ ၅၄.၉ ဘီလျံ ချမ်းသာပါတယ်။ သူ့နောက်မှာ Tencent Holdings ဥက္ကဌ မာ ဟွားတန် ၊ ByteDance တည်ထောင်သူ ကျန်ယိမင်း နဲ့ PDD Holdings တည်ထောင်သူ ကောလင်းဟွမ်တို့က အစဉ်အတိုင်း ရပ်တည်နေပါတယ်။