ပြည်တွင်းထုတ်ကုန်အချို့ နိုင်ငံခြားကုမ္ပဏီများအား တင်ပို့ခွင့်ပြု
----------------------
ပြည်တွင်းမှာ ထုပ်လုပ်တဲ့ တစ်ဆင့်မြင့် ပြုပြင်ထုတ်လုပ်ထားတဲ့ အသား၊ ငါး နဲ့ ရေထွက်ကုန်၊ ကောက်ပဲ သီးနှံတွေ အပါအဝင် ကုန်ပစ္စည်းအုပ်စု ၈ မျိုးကို နိုင်ငံခြားကုမ္ပဏီတွေကို တင်ပို့ခွင့် ပြုတယ်လို့ စီးပွားရေးနှင့် ကူးသန်းရောင်း ဝယ်ရေးဝန်ကြီးဌာနက အမိန့်ကြော်ငြာစာ ထုတ်ပြန်ပါတယ်။

ပြည်တွင်းအရည်အသွေးမြင့် ထုတ်ကုန်တွေကို ပြည်ပဈေးကွက် ချဲ့ထွင်တင်ပို့ပြီး ထုတ်လုပ်နိုင်စွမ်းကို မြှင့်တင်ဖို့၊ ပြည်ပဈေးကွက် ပိုမိုရရှိဖို့နဲ့ ထုတ်လုပ်သူတွေရဲ့ ရောင်းဈေးပိုမိုရရှိစေဖို့အတွက် ရည်ရွယ်ပြီး တင်ပို့ခွင့် ပြုတာလို့ ဆိုပါတယ်။

ပြည်ပကို တင်ပို့ခွင့်ပြုတဲ့ ကုန်ပစ္စည်း ၈ မျိုးမှာ တစ်ဆင့်မြင့် ပြုပြင်ထုတ်လုပ်ထားတဲ့ အသား၊ ငါး နဲ့ ရေထွက် ကုန်တွေ၊ ကောက်ပဲသီးနှံတွေ၊ ပျော့ဖတ်နဲ့ စက္ကူအမျိုးမျိုး၊ သန့်စင်ထားတဲ့ သတ္တုရိုင်းတွေ၊ သစ်သီးဝလံ ပန်းမန် ကုန်ကြမ်းတွေကနေ အဆင့်မြင့်ထုတ်လုပ်ထားတဲ့ တစ်ဝက်တစ်ပျက် ကုန်ချော ဒါမှမဟုတ် ကုန်ချောပစ္စည်းတွေ၊ သစ်အခြေခံပရိဘောဂပစ္စည်းတွေ၊ သဘာဝပတ်ဝန်းကျင်ထိန်းသိမ်းမှု အထောက်အကူပြု ကုန်စည်တွေ ဖြစ်ပါ တယ်။

အဲဒီကုန်ပစ္စည်း ၈ မျိုးကို နိုင်ငံခြားကုမ္ပဏီတွေအနေနဲ့ မြန်မာနိုင်ငံအတွင်း ကိုယ်တိုင်ထုတ်လုပ်ပြီးဖြစ်စေ ထုတ်လုပ်သူတွေဆီက တစ်ဆင့်ဝယ်ယူပြီးဖြစ်စေ ပြည်ပကို တင်ပို့ခွင့်ပြုတာလို့ အမိန့်ကြော်ငြာစာအရ သိရပါတယ်။ ပြည်ပကို တင်ပို့ခွင့်ပြုတဲ့ ကုန်ပစ္စည်းတွေကို တင်ပို့ရာမှာ သက်ဆိုင်ရာဦးစီးဌာနတွေရဲ့ ထောက်ခံ ချက်နဲ့ ကုန်သွယ်ရေးဦးစီးဌာနရဲ့ ပို့ကုန်လိုင်စင်ခွင့်ပြုချက် ရယူရမှာ ဖြစ်ပါတယ်။

တစ်ဆင့်မြင့် ပြုလုပ်ထားတဲ့ ဆန်နဲ့ ဆန်ကွဲ တင်ပို့ရာမှာတော့ ပို့ကုန်လိုင်စင် ခွင့်ပြုချက်ရယူရမှာအပြင် ပြည်ပက ပြည်တွင်းဘဏ်တစ်ခုခုကို ကနဦးရင်းနှီးမြှုပ်နှံမှု ထည့်ဝင်ငွေ အနည်းဆုံးဒေါ်လာ ၃ သန်း လွှဲပြောင်းပြီးကြောင်း အထောက်အထား၊ လုံလောက်တဲ့ သိုလှောင်ရုံရှိကြောင်း အထောက်အထားနဲ့ မြန်မာနိုင်ငံဆန်စပါးအသင်းချုပ်ရဲ့ အသင်းဝင်ဖြစ် ကြောင်း အထောက်အထားတွေ လိုအပ်တယ်လို့လည်း အမိန့်ကြော်ငြာစာမှာ ပါရှိပါတယ်။

သန့်စင်ထားတဲ့ သတ္တုရိုင်းတွေအတွက်ကတော့ မြန်မာ့သတ္တုတွင်းဥပဒေအရ သက်ဆိုင်ရာဝန်ကြီးဌာနရဲ့ ဓာတ် သတ္တုရောင်းချခြင်း နဲ့ ဝယ်ယူခြင်းခွင့်ပြုမိန့်နဲ့ သတ္တုတွင်းဦးစီးဌာနရဲ့ ထောက်ခံချက်တို့နဲ့အတူ ကုန်သွယ်ရေးဦးစီး ဌာနရဲ့ ပို့ကုန်လိုင်စင်ခွင့်ပြုချက် ယူရမှာ ဖြစ်တယ်လို့ သိရပါတယ်။