ဝန်ကြီးချုပ်ဟောင်း မန်မိုဟန်ဆင်း အသက်(၉၂)နှစ်တွင် ကွယ်လွန်
-------------------------
အိန္ဒိယစီးပွားရေးပြုပြင်ပြောင်းလဲမှုရဲ့ ဗိသုကာဖြစ်တဲ့ ဝန်ကြီးချုပ်ဟောင်း မန်မိုဟန်ဆင်းဟာ အသက်(၉၂)နှစ် အရွယ်မှာ ကြာသပတေးနေ့က ကွယ်လွန်သွားပြီ ဖြစ်ပါတယ်။ ဆင်းဟာ ဝန်ကြီး ချုပ်အဖြစ် ထမ်းဆောင်ခဲ့တဲ့ ၂၀၀၄ -၂၀၁၄ ကာလအတွင်း စီးပွားရေး ဖြေလျှော့မှုတွေများစွာနဲ့အတူ ပြုပြင်ပြောင်းလဲရေးကို ပဲ့ကိုင်ခဲ့တဲ့ ဗိသုကာအဖြစ် သတ်မှတ်ခံထားရသူပါ။
ဝန်ကြီးချုပ်မဖြစ်ခင်က ဗဟိုဘဏ်ဥက္ကဋ္ဌ၊ ဘဏ္ဍာရေးဝန်ကြီး စတဲ့ ရာထူး တွေကိုလည်း တာဝန်ယူခဲ့ဖူးသူလည်း ဖြစ်ပါတယ်။ လက်ရှိဝန်ကြီးချုပ်မိုဒီကလည်း ဆင်းနဲ့ သိကျွမ်းဆက်ဆံခဲ့တဲ့ ကာလတစ်လျှောက်လုံးမှာ ဆင်းရဲ့ ဉာဏ်ပညာနဲ့ နှိမ့်ချမှုကို အမြဲတမ်း ထင်ရှားစွာတွေ့ခဲ့ရပြီး ပြည်သူ့ဘ၀ တိုးတက်ရေးအတွက် စွမ်းစွမ်းတမံ အားထုတ်လုပ်ဆောင်ခဲ့သူလို့ မှတ်ချက်ပြု ပြောဆိုပါတယ်။
ကွန်ဂရက်စ်ပါတီ ခေါင်းဆောင် ရာအူးလ် ဂန္ဒီကလည်း သူ့အနေနဲ့ အကြံပေး လမ်းပြပေးမဲ့သူတစ်ယောက် ဆုံးရှုံး လိုက်ရပြီလို့ ဆင်း ကွယ်လွန်ခြင်းအပေါ်မှာ မှတ်ချက်ပြု ပါတယ်။ ဆင်းဟာ ဂျဝါဟာလာနေရူး နောက်ပိုင်း ဒုတိယ အကြိမ် ဝန်ကြီးချုပ် သက်တမ်း ပြန်အရွေးခံရတဲ့ ပထမဆုံး အိန္ဒိယခေါင်းဆောင်ဖြစ်ခဲ့သလို နိုင်ငံ့အမြင့်ဆုံး ရာထူး ကို ပထမဆုံး ထမ်း ဆောင်ခဲ့တဲ့ ဆစ်ခ်အမျိးသား တစ်ယောက်လည်း ဖြစ်ပါတယ်။
၁၉၈၄ ခုနှစ်က ဖြစ်ပွားခဲ့တဲ့ အဓိကရုဏ်းအတွင်း ဆစ်ခ်(၃၀၀၀) သေဆုံးခဲ့ရမှုအပေါ် ပါလီမန်ကနေတစ်ဆင့် လူထု ကို တရားဝင် တောင်းပန်ခဲ့ဖူးသလို သူ့ရဲ့ ဒုတိယ အကြိမ် သက်တမ်းအတွင်းမှာလည်း ခြစားမှုစွပ်စွဲချက်တွေနဲ့ ရင်ဆိုင်ခဲ့ရပါတယ်။ အောက်စ်ဖို့တက္ကသိုလ်ကနေ (Dphil)ဘွဲ့ ရရှိခဲ့သူ ဆင်းဟာ ၁၉၉၁ ခုနှစ် အိန္ဒိယနိုင်ငံ ဒေဝါ လီခံရမှုနဲ့ ရင်ဆိုင်နေရချိန် ဘဏ္ဍာရေးဝန်ကြီးအဖြစ် ခန့်အပ်ခံရတဲ့နောက် နိုင်ငံရေးလောကမှာ ထင်ပေါ်ကျော် ကြား လာခဲ့သူဖြစ်ပါတယ်။
