Part-4
ဒီမိုကရေစီ ဟူသည် (၂)
ရှေးဂရိဒီမိုကရေစီ
အထက်က ဆိုခဲ့တာတွေသည် ဒီမိုကရေစီ စံချိန်ပြည့် အနေအထားမှာ မည်သို့ ရှိလိမ့်မည် ဟူသည်ကို ဖော်ပြထားခြင်း ဖြစ်ပါသည်။
ထို့ကြောင့် “အားလုံး” “တန်းတူညီမျှ’ စသဖြင့် ဆိုခဲ့ခြင်း ဖြစ်သည်။
သို့သော် တကယ်လက်တွေ့ ကျင့်သုံးကြသည့်အခါ အဲသည်လောက် စံချိန်ပြည့် ဖြစ်လေ့မရှိ။
ဒီမိုကရေစီ အစပြုရာဟု ဆိုကြသည့် ဂရိဒေသ ဘီစီ ၄ ရာစု ၅ ရာစုခေတ်က အက်သင်း(စ)မြို့နိုင်ငံ (city-state) နှင့် ၎င်းအနီးဝန်းကျင်ရှိ အခြား ဒီမိုကရေစီ မြို့နိုင်ငံများ၌ ကျင့်သုံးခဲ့သည့် စနစ်မှာပင် တန်းတူညီမျှမှုနှင့် စပ်လျဉ်း၍ အားနည်းချက် ရှိခဲ့သည်။
အဲဒါက ဒီမို-ကရေစီ (လူထု-အုပ်စိုးမှု)ဟု ၎င်းတို့ ဆိုသော်လည်း၊ ၎င်းတို့ သတ်မှတ်သည့် လူထု သို့မဟုတ် အုပ်စိုးသူ လူထုထဲတွင် ယောက်ျားများချည်းသာ ပါဝင်ခြင်း ဖြစ်သည်။
မိန်းမများမပါ။ မိန်းမများကို မြို့နိုင်ငံအရေး စဉ်းစားဆုံးဖြတ်ရာတွင် ပါဝင်သင့် သူများဟု မယူဆ။
ထို့ပြင် ယောက်ျားဖြစ်သော်လည်း ပါဝင်ခွင့်မရသူတွေ ရှိသေးသည်။ အရေအတွက် အရ အများအပြားပင် ရှိသည်။ အဲဒါက ကျွန်တွေ။ ကိုယ့်ကိုယ်ကိုယ်ပင် မပိုင်သော ထိုသူတွေကို တိုင်းပြည်အရေး ဆွေးနွေးရာ၌ ထည့်သွင်းဖို့ လိုသည်ဟု မယူဆ။
ထို့ကြောင့် လွတ်လပ်သော နိုင်ငံသား ယောက်ျားများချည်းသာ တိုင်းပြည်ရေးရာ များကို စုပေါင်း ဆုံးဖြတ်ကြ စီမံခန့်ခွဲကြ၍ ၎င်းတို့ အချင်းချင်းကြား၌ကား အထက်တွင် ဖော်ပြခဲ့သည့် ဒီမိုကရေစီ အခြေခံများကို အပြည့်အဝ ကျင့်သုံးကြသည်။
ဥပမာ၊ စစ်တိုက်ခြင်း၊ စစ်ပြေငြိမ်းခြင်း စသည့် အရေးကြီးသော ကိစ္စရပ်များကို နိုင်ငံသားအားလုံး တက်ရောက်သည့် လူထုစည်းဝေးပွဲကြီး များအားဖြင့် ဆုံးဖြတ်ကြသည်။ မြို့နိုင်ငံအတွက် ဥပဒေများ ပြဋ္ဌာန်းရာ ၌လည်း ၎င်းအတိုင်းပင် ကျင့်သုံးကြသည်။ ထိုခေတ် ဂရိ မြို့နိုင်ငံများ၌တိုင်းပြည်အရေး ဆွေးနွေးရာတွင် ပါဝင်ခွင့်ရှိသည့် လွတ်လပ်သော နိုင်ငံသားဦးရေမှာ သောင်းဂဏန်းမျှသာ ရှိသည်ဖြစ်ရာ အားလုံးပါဝင်သော လူထု စည်းဝေးပွဲကြီးများ ကျင်းပနိုင်ကြ၏။
သို့သော် အမြဲ နေရာတကာ လူတိုင်း ပါဝင်မနေနိုင်ဘဲ၊ လက်တွေ့ အုပ်ချုပ်ရေး၊ တရားစီရင်ရေး စသည့် ကိစ္စရပ်များအတွက် လူအနည်းငယ်မျှစီ ကိုသာ ပုံမှန်တာဝန် ပေးရဦးမည်ဖြစ်ရာ သတ်မှတ်ထားသော သက်တမ်း ကာလအတွင်း တာဝန်ယူရမည့်သူများကို နိုင်ငံသားများ အားလုံးထဲမှ မဲနှိုက်၍ လည်းကောင်း၊ အလှည့်ကျစနစ်ဖြင့် လည်းကောင်း ရွေးချယ်သည်။
သည်အပိုင်းတွင်ကား ဆင်းရဲချမ်းသာ မခွဲခြား၊ အတန်းအစား မခွဲခြား၊ ပညာတတ်သူ မတတ်သူ မခွဲခြား တန်းတူညီမျှထားခြင်း ဖြစ်သည်။
#ဆက်ရန်ရှိ
