အတိုက်အခံတွေရဲ့ ဘတ်ဂျက်ပြုပြင်မှု ကာကွယ်ရေးအသုံးစရိတ်ကို ထိခိုက်ကြောင်း ထိုင်ဝမ်အစိုးရပြော
နိုင်ငံတကာ၊ ဒီဇင်ဘာ ၂၆
လာမယ့်နှစ် ဘတ်ဂျက်နဲ့ပတ်သက်ပြီး အတိုက်အခံပါတီဦးဆောင်တဲ့ ပြန်လည်ပြင်ဆင်ချက်တွေကြောင့် အမျိုးသားလုံခြုံ ရေးနဲ့ ကာကွယ်ရေးဘတ်ဂျက်ကို ထိခိုက်နိုင်ကြောင်း ထိုင်ဝမ်အစိုးရအဖွဲ့က ဒီဇင်ဘာ ၂၃ ရက်နေ့ (တနင်္လာနေ့) က ပြောကြားလိုက်ပါတယ်။
အတိုက်အခံအဖွဲ့ကလွှမ်းမိုးထားတဲ့လွှတ်တော်က ပြီးခဲ့တဲ့သီတင်းပတ်က ဗဟိုအစိုးရဘတ်ဂျက်ထဲက အစိုးရအခွန်ဝင်ငွေ ထိုင်ဝမ်ဒေါ်လာ ၃၇၅.၃ ဘီလျံ (ဒေါ်လာ ၁၁.၅ ဘီလျံ) ကို လျှော့ချဖို့ ပြန်လည်ပြင်ဆင်ခဲ့တဲ့အတွက် အာဏာရပါတီက ပြင်းပြင်းထန်ထန် ဝေဖန်ခဲ့ပါတယ်။
“အခုလုပ်ရပ်ကြောင့် စီးပွားရေးဖွံ့ဖြိုးတိုးတက်မှု၊ လူမှုဖူလုံရေးနဲ့ အမျိုးသားကာကွယ်ရေးကဏ္ဍတွေမှာ အစိုးရရဲ့ ဘတ် ဂျက်သုံးစွဲမှုအပေါ် ဆိုးဆိုးရွားရွား ထိခိုက်စေမှာဖြစ်ပါတယ်။” လို့ ထိုင်ဝမ်ဘဏ္ဍာရေးဝန်ကြီး ချောင်ဆူးယန်က တနင်္လာနေ့က ပြုလုပ်ခဲ့တဲ့ အစိုးရသတင်းစာရှင်းလင်းပွဲမှာ ပြောပါတယ်။
ထိုင်ဝမ်ကျွန်းဟာ တရုတ်နိုင်ငံရဲ့ စစ်ရေးခြိမ်းခြောက်မှုတွေနဲ့ ပိုမိုရင်ဆိုင်နေရတာမို့လို့ အခုလို ဘတ်ဂျက် ဖြတ်တောက်တဲ့ ဥပဒေကြမ်းချမှတ်ဖို့ဆောင်ရွက်နေတာဟာ ထိုင်ဝမ်ဒီမိုကရေစီစနစ်ကို ထိခိုက်စေနိုင်တဲ့ အတွက် အဲဒီဥပဒေကြမ်းကို အာဏာရ ဒီမိုကရေစီဖွံ့ဖြိုးတိုးတက်ရေးပါတီ (DDP) က ပိတ်ပင်ဖို့ ကြိုးပမ်းခဲ့ပါတယ်။
အခု ပြန်လည်ပြင်ဆင်ချက်ဥပဒေကြမ်းအရ ကာကွယ်ရေးဘတ်ဂျက် ထိုင်ဝမ်ဒေါ်လာ ၂၉၄.၅ ဘီလျံ (ဒေါ်လာ ၉ ဘီလျံ) ပါဝင်တဲ့ လာမယ့်နှစ် ဘတ်ဂျက်ရဲ့ ၂၈ ရာခိုင်နှုန်းကို ဖြတ်တောက်သွားမှာဖြစ်ကြောင်း ထိုင်ဝမ်အစိုးရ အဖွဲ့က ပြောပါတယ်။
အခုပြင်ဆင်ချက်ကို ဗဟိုအစိုးရနဲ့ ဒေသအစိုးရအဖွဲ့တွေကြား အားလုံးသဘောတူညီမှုမရှိဘဲ ပြဋ္ဌာန်းခဲ့တာဖြစ်ပြီး အစိုးရ အဖွဲ့အနေနဲ့ ဘတ်ဂျက်ထိန်းသိမ်းထားဖို့အတွက် “ဖွဲ့စည်းပုံအခြေခံဥပဒေက ခွင့်ပြုထားတဲ့ နည်းလမ်းတွေ” ကို ရှာဖွေ သွားမှာဖြစ်ကြောင်း ပြောပါတယ်။
ထိုင်ဝမ်နိုင်ငံရဲ့ တိုက်ခိုက်ရေးစွမ်းရည်ကို ပြင်းပြင်းထန်ထန် ပြန်လည်ညှိယူနိုင်ကြောင်း၊ အခုပြန်လည် ပြင်ဆင်ချက်ဟာ ထိုင်ဝမ်ပြည်သူ ၂၃ သန်းရဲ့ ဘဝလုံခြုံရေးကို လျော့ပါးစေနိုင်ကြောင်း သမ္မတလိုင်ချင်တီးက စနေနေ့က ပြောပါတယ်။
သောကြာနေ့ (ဒီဇင်ဘာ ၂၀ ရက်နေ့) က ပြဋ္ဌာန်းလိုက်တဲ့ ပြန်လည်ပြင်ဆင်ချက်တွေကြောင့် လွှတ်တော်ထဲမှာ အမတ် အချင်းချင်း ရန်ပွဲတွေဖြစ်ပွားခဲ့သလို လွှတ်တော်အပြင်ဘက်မှာလည်း လူဦးရေထောင်ပေါင်းများစွာ စုဝေးဆန္ဒပြခဲ့ကြပါတယ်။
တရုတ်အန္တရာယ်ကိုကာကွယ်ဖို့အတွက် အာဏာရ DDP ပါတီက လက်ရှိနှစ်ကာကွယ်ရေးအသုံးစရိတ်ထက် ၇.၇% တိုးမြှင့်ပြီး ၂၀၂၅ ခုနှစ် ကာကွယ်ရေး ဘတ်ဂျက်ကို ထိုင်ဝမ် ဒေါ်လာ ၆၄၇ ဘီလျံ (ဒေါ်လာ ၂၀.၂၄ ဘီလျံ) စံချိန်တင် အဆိုပြုတင်ပြခဲ့တာဖြစ်ပါတယ်။
အဓိကအတိုက်အခံပါတီဖြစ်တဲ့ ကူမင်တန်ပါတီ (KMT) က ၎င်းတို့အနေနဲ့ ဒေသဆိုင်ရာအစိုးရတွေအတွက် ဘဏ္ဍာရေး သုံးစွဲခွင့်မြှင့်တင်ဖို့အတွက် အခုလိုပြန်လည်ပြင်ဆင်ခဲ့တာဖြစ်ကြောင်း ကာကွယ်ပြောဆိုပါတယ်။
တရုတ်လိုလားတယ်လို့ ထိုင်ဝမ်မှာရှုမြင်ထားကြတဲ့ ကူမင်တန်ပါတီ (KMT) နဲ့ ၎င်းတို့ရဲ့မဟာမိတ် ထိုင်ဝမ်ပြည်သူ့ပါတီတို့ဟာ လွှတ်တော်အင်အား တိုးချဲ့ဖို့အတွက် နောက်ထပ် အငြင်းပွားဖွယ်ရာ ပြုပြင်ပြောင်းလဲမှုတစ်ခုကို ပြဋ္ဌာန်းခဲ့ပါ သေးတယ်။
Ref: Taiwan Govt Says Opposition-Led Amendments Risk Defense Budget
#centralnewsnaypyitaw
