ဒေါ်နယ်ထရမ့်ရဲ့ပရိယာယ်
----------------------------------------
ကနေဒါက အမေရိကန်ရဲ့ ၅၁ ခုမြောက်ပြည်နယ် ဖြစ်လာနိုင်တယ်၊ ဗဟိုအမေရိကနာမည်နဲ့ နှစ်အစိတ်လောက် ထိန်းချုပ်ခဲ့တဲ့ အမေရိကန်လုပ် ရေလမ်းကြောင်းဖြစ်တဲ့ ပနားမားတူးမြောင်းကို သိမ်းပိုက်မယ်၊ ဒိန်းမတ်နယ်မြေဖြစ်တဲ့ ဂရင်းလန်းကိုလည်း မျက်စိကျတယ်။
ဒါတွေက မကြာခင်က ဒေါ်နယ်ထရမ့် ခြိမ်းခြောက်သလိုလို လှောင်ပြောင်သလိုလို ပြောခဲ့တဲ့ အမေရိကန်ပိုင်နက် နယ်မြေ ချဲ့ထွင်ရေးစကားလုံးတွေပါ။
ထရမ့်ထုံးစံအတိုင်း လေးနက်ပုံရတဲ့ အဆိုပြုချက်တွေံက မီဒီယာတွေအာရုံစိုက်အောင် လှုံ့ဆော်တာလား ဒါမှမဟုတ် သူ့အခြေခံ ခွန်အားဖြစ်အောင် ရည်ရွယ်တဲ့ သဘောထားတွေကွဲအောင် ကြိုးပမ်းတာလား မရှင်းပါဘူး။ တခြားအချိန်တွေမှာတော့ သူ ဒီလို ရန်စတာက အပေးအယူလုပ်ဖို့ ကြိုးပမ်းဖို့ နိဒါန်းပျိုးတာပါ။
မဲဆွယ်တုန်းကတော့ အမေရိကန်ဟာ ပြည်ပဝင်ရောက်စွက်ဖက်မှုတွေကနေ နောက်ပြန်ဆုတ်သင့်တယ်လို့ ပြောထားတာနဲ့ ဆန့်ကျင်ဖက်လို ဖြစ်နေတယ်။ တစ်ဘက်မှာ အမေရိကန် ပထမ ဆိုတဲ့ အမျိုးသားရေးကြွေးကျော်သံနောက် လိုက်သလိုလို..။
မက္ကဆီကိုက မူးယစ်ဂိုဏ်းတွေကို အကြမ်းဖက်အဖွဲ့အဖြစ် ကြေညာပြီး အထူးတပ်လွှတ် ချေမှုန်းမလိုလိုလည်း ထရမ့် ပြောခဲ့တယ်၊
ပနားမားတူးမြောင်းကို ၂၀ ရာစုအပြောင်းအလဲမှာ အမေရိကန်က တည်ဆောက်ခဲ့ပြီး ၁၉၉၉ ခုနှစ်အထိ အမေရိကန်ကပဲ ထိန်းချုပ်လည်ပတ်ခဲ့ပါတယ်။ သမ္မတဂျင်မီကာတာ လက်ထက်မှာ အမေရိကန်ထာဝရအသုံးပြုခွင့်နဲ့အတူ တူးမြောင်းကို ပနားမားနိုင်ငံကို အပြည့်အဝလွှဲပြောင်းပေးခဲ့ပါတယ်။
အခု ပနားမားက အမေရိကန်ကုမ္ပဏီတွေအပေါ် ဆက်ဆံပုံနဲ့ပတ်သက်ပြီး မကျေနပ်စရာတွေ ထွက်လာတဲ့နောက် ထရမ့်ဆီက အသံထွက်လာတာပါ၊ ပနားမားသမ္မတ ဂျိုဆေး ရောလ် မူလီနိုကတော့ ဆိပ်ကမ်းပိုင်ဆိုင်မှုကို “ညှိနှိုင်းလို့မရ”လို့ ဆိုရှယ်မီဒီယာမှာ ရေးခဲ့ပါတယ်။
ပနားမားတူးမြောင်းရဲ့ စတုရန်းမီတာတိုင်းနဲ့ ကပ်လျက်ဧရိယာတိုင်းဟာ ပနားမားပိုင်ဖြစ်ပြီး ဆက်လက် တည်ရှိနေတယ်ဆိုတာကို အတိအကျဖော်ပြချင်ပါတယ်လို့ ဆိုပါတယ်၊
အမှန်တော့ တူးမြောင်းသုံးတဲ့ အမေရိကန်သင်္ဘောတွေအတွက် အခလျှော့ချဖို့ ပနားမားကို ဖိအားပေးနေတာ၊ ဒါက နိုင်ငံခြားကုန်စည်တွေအပေါ် အခွန်စည်းကြပ်ဖို့ ရည်ရွယ်ထားရာကနေ ကုန်စည်ဈေးတွေ တက်လာမှာကို ကာမိအောင် ရည်ရွယ်တာ ဆိုကြပါတယ်။
ဒိန်းမတ်နိုင်ငံရဲ့ ကိုယ်ပိုင်အုပ်ချုပ်ခွင့်ရ ဂရင်းလန်းနယ်မြေကို ဝယ်ယူမယ်ဆိုတာ ထရမ့် ပထမသက်တမ်းတုန်းကလည်း ပြောခဲ့ဖူးပါတယ်။ အဲဒီတုန်းက ငြင်းခဲ့တဲ့ဒိန်းမတ်က အခုလည်း လက်မခံပါဘူး။ ဂရင်းလန်းဟာ ရောင်းကုန်မဟုတ်တဲ့ပိုင်နက်လို့ ဒိန်းမတ်၀န်ကြီးချုပ်က တုံ့ပြန်ခဲ့ပါတယ်။
ကမ္ဘာတဝန်း အမေရိကန် အမျိုးသားလုံခြုံရေးနဲ့ လွတ်လပ်မှုဆိုင်ရာ ရည်ရွယ်ချက်တွေအတွက် ဂရင်းလန်းကို ပိုင်ဖို့ လုံးဝလိုအပ်တယ်လို့ ထရမ့်က ပြောခဲ့ပါတယ်။
ကနေဒါကို ၅၁ ခုမြောက် အမေရိကန်ပြည်နယ် လုပ်မယ်ဆိုတာတော့ အလေးအနက်ပြောတာမဟုတ်ဘဲ မကြာခင်က မာရာလာဂိုမှာ ဂျပ်စတင်ထရူးဒိုးနဲ့အတူ ထမင်းစားပြီးနောက် ထရမ့်က လှောင်ပြောင်နေတာပါ။
ကနေဒါနဲ့ မက္ကဆီကိုက ကုန်ပစ္စည်းတွေအပေါ် အခွန် ၂၅ ရာခိုင်နှုန်း ကောက်ခံဖို့ ထရမ့်ပြောထားတဲ့ကိစ္စ နောက်ဆက်တွဲ အနေနဲ့ ထွက်လာတာပါ။ နှစ်နိုင်ငံစလုံးက ခေါင်းဆောင်တွေဟာ နယ်စပ်ပြဿနာတွေအတွက် အမေရိကန်ကို ကူညီဖို့ သူတို့ကတိကို အတည်ပြုဖို့ ကြိုးစားခဲ့ရပါတယ်။
ဒါကြောင့် ထရမ့်က နယ်စပ်ကို လုံခြုံစေပါပြီလို့ သူ့ရဲ့ အသွင်ကူးပြောင်းရေး အဖွဲ့က မကြာသေးခင်က ရေးခဲ့ပါတယ်၊ ဒါတောင် သူ သမ္မတရာထူးရသေးတာ မဟုတ်ပါဘူးတဲ့။
Credit