အဇာဘိုင်ဂျန်ခရီးသည်တင်လေယာဉ် ကာဇက်စတန်တွင်ပျက်ကျ
---------
အဇာဘိုင်ဂျန်လေကြောင်းက ခရီးသည် ၆၇ ဦးလိုက်ပါလာတဲ့ ခရီးသည်တင်လေယာဉ်တစ်စင်း ကာဇက်စတန်နိုင်ငံမှာ ပျက်ကျခဲ့တယ်လို့ ဒေသဆိုင်ရာ အာဏာပိုင်များက ပြောဆိုပါတယ်။
ပဏာမအစီရင်ခံချက်တွေအရ အသက်ရှင်ကျန်ရစ်သူ ၂၅ ဦးရှိပြီး အဲဒီအထဲက ၂၂ ဦးကို ဆေးရုံတင်ပို့ ကုသထားတယ်လို့ ကာဇက်စတန် အရေးပေါ်ဝန်ကြီးဌာနက ထုတ်ပြန်ပါတယ်။ လူ ၄၂ ဦး သေဆုံးဖွယ် ရှိတယ်လို့ သိရပါတယ်။
အဇာဘိုင်ဂျန်လေကြောင်းက Embraer 190 အမျိုးအစား ခရီးသည်တင်လေယာဉ်ဟာ အက်တော်မြို့အနီးမှာ ပျက်ကျစဉ် မီးလောင်မှု ဖြစ်ပွားခဲ့ပေမယ့် မီးငြိမ်းသွားခဲ့တယ်လို့ တာဝန်ရှိသူတွေက ပြောပါတယ်။ ခရီးသည် ၆၂ ဦးနဲ့ လေယာဉ်အမှုထမ်း ၅ ဦး လိုက်ပါခဲ့တဲ့လေယာဉ် ပျက်ကျရတဲ့ အကြောင်းရင်းကို မသိရသေးပါဘူး။
ပျက်ကျလေယာဉ်ဟာ အဇာဘိုင်ဂျန်လေကြောင်းလိုင်း ခရီးစဉ်အမှတ် J2-8243 အဖြစ် အဇာဘိုင်ဂျန်မြို့တော် ဘာကူကနေ ရုရှားနိုင်ငံ ဂရိုဇနီမြို့ကို ပျံသန်းခဲ့တာလို့ ဆိုပါတယ်။ မြူခိုးတွေကြောင့် လမ်းပြောင်းသွားတယ်လို့ သတင်းတွေက ဆိုပါတယ်။
အဇာဘိုင်ဂျန်လေကြောင်းလိုင်းနဲ့ လေယာဉ်ထုတ်လုပ်တဲ့ ဘရာဇီး Embraer ကုမ္ပဏီတွေကတော့မှတ်ချက်ပေးခြင်း မရှိသေးပါဘူး။
