Part-2
ဒီမိုကရေစီ ဟူသည် (၂)
အားလုံး အရေးအတွက် အားလုံး ပါဝင် ဆုံးဖြတ်ခြင်း
နိုင်ငံရေး သိပ္ပံပညာရှင်များကတော့ ဒီမိုကရေစီစနစ်ဟူသည် လူတစ်စု၊ အသင်းအဖွဲ့တစ်ခု၊ သို့မဟုတ် လူ့အဖွဲ့အစည်းတစ်ရပ်အတွင်း ဆုံးဖြတ်ချက် တစ်စုံတစ်ရာ ချမှတ်ရာ၌ ၎င်းအစုအသင်း သို့မဟုတ် လူ့အဖွဲ့အစည်းတွင် ပါဝင်သူအားလုံးတို့ မိမိ သဘောဆန္ဒ အသီးသီးကို ဖော်ပြခွင့်ရကြ၍ ယင်းအား တန်းတူညီမျှ ထည့်သွင်း စဉ်းစားမှုပြုသော စနစ်မျိုးကို ဆိုသည်ဟု အခြေခံအချက်ကို ချုပ်၍ ရှင်းလင်း ဖွင့်ဆိုလေ့ရှိကြသည်။
ဆုံးဖြတ်ချက်၊ ဆုံးဖြတ်ချက်များ။
လူတိုင်း၏ ဘဝမှာ နေ့စဉ်နှင့်အမျှ ဆိုသလို ဆုံးဖြတ်ချက် ကြီးငယ်တွေ ချမှတ်ကြ ရသည်။ အိမ်ထောင်ရေး၊ စီးပွားရေး၊ ပညာရေး၊ ကျန်းမာရေး စသည် စသည် ...
အဲဒါတွေသည် မိမိ တစ်ဦးတည်းနှင့်ဆိုင်သော ကိစ္စသက်သက်ဖြစ်က မိမိဘာသာ နှစ်သက်ရာ ဆုံးဖြတ်၍ ထိုဆုံးဖြတ်ချက်တို့၏ ကောင်းကျိုး ဆိုးကျိုးကို မိမိဘာသာ ခံစားရုံပဲ ဖြစ်သည်။
သို့သော် တချို့ကိစ္စရပ်များသည် မိမိကိုယ်ပိုင် ကိစ္စရပ်များ ဖြစ်သည့်တိုင် ယင်းတို့နှင့်စပ်လျဉ်း၍ စဉ်းစားဆုံးဖြတ်မည်ပြုသည့်အခါ အခြားသူတို့၏ သဘောဆန္ဒများ၊ သို့မဟုတ် မိမိ ကျင်လည်ရာ လူ့အဖွဲ့အစည်းက ချထားခဲ့သည့် ဆုံးဖြတ်ချက်များနှင့် ရောယှက် ငြိုတင်နေတာမျိုး ရှိတတ်သည်။ မိမိက ဤသို့ ဆုံးဖြတ်ချင်သည်၊ သို့သော်အများသို့မဟုတ် လူ့အဖွဲ့အစည်းက ခွင့်မပြုဟူသော အနေအထားမျိုး ဖြစ်သည်။
ဥပမာ အထက်က ဆိုခဲ့သည့် အိမ်ထောင်ရေး၊ စီးပွားရေး စသည့် ကိစ္စများပဲ ဆိုပါစို့။
မိမိက ဘယ်သူဘယ်ဝါနှင့် အိမ်ထောင်ပြုချင်သည်။ သို့သော် လက်ထပ် ထိမ်းမြားခြင်း ဆိုင်ရာ ဥပဒေများက တစ်စုံတစ်ရာသော အချက်ကို အကြောင်းပြု၍ မိမိအား တရားဝင် လက်ထပ်ခွင့်မရအောင် ဟန့်တား ထားသည်။
အလားတူ၊ စီးပွားရေး လုပ်ငန်းတစ်ရပ် ထူထောင်ချင်သည်။ စည်းကမ်းဥပဒေ တစ်ခုက မိမိ ရွေးချယ်သည့်လုပ်ငန်း လုပ်ခွင့်မရအောင် ဟန့်တားနေသည်။
အလားတူ၊ ပညာရေး ဝန်ဆောင်မှု လုပ်ငန်းတစ်ခု လုပ်ချင်သည်။ စည်းမျဉ်း စည်းကမ်း အဟန့်အတားကြောင့် မလုပ်နိုင်။
#ဆက်ရန်ရှိ
