ထိုင်းထီအမြင့်ဆုံးဆု ဘတ် ၆ သန်း ၂စောင်တွဲ ၁၂ သန်းကို မြန်မာဇနီးမောင်နှံ ကံထူး

ဒီဇင်ဘာ ၁၇

ဒီဇင်ဘာ ၁၆ ရက်မှာ ဖွင့်လှစ်ခဲ့တဲ့ ထိုင်းထီရဲ့ အမြင့်ဆုံး ဘတ် ၆ သန်းဆုကို ၂စောင်တွဲ ၁၂ သန်း ကို ထိုင်းရောက်မြန်မာအလုပ်သမား ဇနီးမောင်နှံက ကံထူးသွားတယ်လို့ ဆုငွေထုတ်ယူရာမှာကူညီခဲ့တဲ့ အလုပ်သမားကူညီရေးအဖွဲ့ အေအေစီကိုရဲမင်းရဲ့ MHAC အဖွဲ့ က ဆိုပါတယ်။

ကံထူးသွားသူ ၂ ဦးဟာ ချွန်ဘူရီခရိုင်ထဲက ကွန်ပျူတာပစ္စည်းစက်ရုံမှာအလုပ်လုပ်ကိုင်ကြတဲ့ မြန်မာရွှေ့ပြောင်း အလုပ်သမားတွေဖြစ်ကြပါတယ်။ ဘတ် ၆ သန်းဆုကို ၂‌ စောင်ပေါက်တာ‌ကြောင့် ဘတ် ၁၂ သန်း ရရှိမှာပါ။

‌သူတို့ ထီ‌‌ပေါက်တယ်သိသိချင်း MHAC ကိုဆက်သွယ်လာလို့ နေ့ချင်းပြီးထုတ်ယူနိုင်အောင် ကူညီခဲ့တယ်လို့ အေအေစီကိုရဲမင်းက ဘီဘီစီကိုပြောပါတယ်။

“အမျိုးသားက အသက်ကြီးတော့ အလုပ်ရုံကမခေါ်လို့ အလုပ်မရှိဘူး။ သူတို့နေတဲ့နားက ဝပ်ဖရောင်းထိုင်း ဘုန်းကြီးကျောင်းမှာ နေ့တိုင်းတံမြတ်စည်းလှည်း၊ ပန်းကပ်၊ သောက်တော်ရေကပ် ကုသိုလ်နေ့တိုင်းယူရင်း ကျောင်းနားက ရောင်းတဲ့ထီထိုးပြီး ပေါက်ခဲ့တာပါ”လို့ သူကပြောပါတယ်။

ထီကံထူးသွားသူ နှစ်ဦးဟာ ကျောက်ဆည်မြို့ဇာတိတွေ ဖြစ်ကြတယ်။

အေအေစီကိုရဲမင်းအဖွဲ့ဟာ ထိုင်းအစိုးရထီ ပထမဆု ၂ စောင်တွဲကံထူးရှင် ၇ ဦးအပါအဝင် ၅၅ ဦးကို ထီဆုငွေ ထုတ်ယူရာမှာ ကူညီပေးခဲ့ပြီဖြစ်တယ်လို့ ဆိုပါတယ်။

ထိုင်းထီမှာ ဘတ် ၂၀၀၀၀ အထိ ဆုငွေတွေကို ထီကိုယ်စားလှယ်တွေဆီမှာ ထုတ်ယူနိုင်ပြီး ဒီထက်များတဲ့ ဆုကြီးတွေကိုတော့ ထိုင်းအစိုးရထီရုံးတွေမှာထုတ်ယူရမှာဖြစ်ပါတယ်။

ပုံစာ - ထိုင်းထီဆုငွေ ထုတ်ယူခဲ့ကြတဲ့ ကံထူးရှင်ဇနီးမောင်နှံ နဲ့ MHAC အဖွဲ့ဝင်တွေ

Credit - BBC

#သတင်းဟင်းလေးအိုးကြီး