ရှမ်းမြောက်၊ သိန္နီမြို့ကို ဗဟိုပြုပြီးငလျင်လှုပ်ခတ်
ဒီဇင်ဘာ ၉
ဒီကနေ့ မနက် ၃ နာရီ ခွဲက ရှမ်းမြောက်၊ သိန္နီမြို့ရဲ့ အရှေ့မြောက်ဘက် (၇) မိုင်ခန့်အကွာကို ဗဟိုပြုပြီး ရစ်(ခ်)တာစကေး ၄ ဒသမ ၅ အဆင့်ရှိတဲ့ အင်အားသင့်ငလျင်လှုပ်ခတ်သွားပါတယ်။
မိုးလေဝသနဲ့ ဇလဗေဒ ညွှန်ကြားမှုဦးစီးဌာန က ထုတ်ပြန်ချက်အရ အဲဒီငလျင်ဟာ မြေပြင်အောက် အနက် (၁၀) ကီလိုမီတာကို ဗဟိုပြုပြီး လှုပ်ခဲ့တာလို့ဆိုပါတယ်။
ငလျင်ဗဟိုပြုတဲ့နေရာဟာ ရှမ်းမြောက် ၊ ကွတ်ခိုင်နဲ့ ကောင်းခါးမြို့တွေနဲ့ ပိုနီးတာကြောင့် အဲဒီမှာနေထိုင်တဲ့ ဒေသခံ တွေက ငလျင်လှုပ်တာကို သိသိသာသာပိုခံစားခဲ့ရတယ်လို့လည်း သိန္နီမြို့ခံတစ်ဦးက ပြောပါတယ်။ အင်အားသင့်ငလျင်ဖြစ်တာကြောင့်ထိခိုက်ပျက်စီးမှုနဲ့ ပတ်သက်ပြီး ဆက်လက်စုံစမ်းနေဆဲဖြစ်ပါတယ်။
ဒါအပြင် အခုလှုပ်တဲ့ငလျင်ဟာ လူဆယ်နဲ့ချီသေဆုံးခဲ့တဲ့ ၂၀၁၁ တာလေငလျင်ပြတ်ရွေ့ကြောနဲ့ ဆက်စပ်မှုရှိ မရှိဘူးဆိုတာကိုတော့ လတ်တလော ထုတ်ပြန်ထားတာမရှိသေးပါဘူး။
#centralnewsnaypyitaw
