အာဏာရပါတီကသပိတ်မှောက်၍ တောင်ကိုရီးယားသမ္မတအပေါ် စွပ်စွဲပြစ်တင်မှုအဆို မအောင်မြင်
ယခုသီတင်းပတ်အစောပိုင်းက နာရီပိုင်းအတွင်း ပျက်ပြယ်သွားသည့် စစ်အုပ်ချုပ်ရေးပြဌာန်းရန် ကြိုးပမ်းခဲ့မှုနှင့် ပတ်သက်၍ စနေနေ့တွင် တောင်ကိုရီးယားသမ္မတ ယွန်းဆွတ်ယိုးလ်အပေါ် စွပ်စွဲပြစ်တင်မှု အဆို ကို မဲပေးမှုသည် သူ၏ အာဏာရပါတီက သပိတ်မှောက်ခဲ့သောကြောင့် အဆိုမအောင်မြင်ဖြစ်ခဲ့ဟု ယွန်ဟပ်သတင်းဌာနက ဖော်ပြသည်။
ဒီမိုကရက်တစ်ပါတီအပါအဝင် အတိုက်အခံနိုင်ငံရေးသမားများက တင်သွင်းခဲ့သော ယင်းအဆို အတည်ဖြစ်ရန် တောင်ကိုရီးယား၏ အမတ်အရေအတွက် ၃၀၀ ရှိ လွတ်တော်တွင် အမတ် သုံးပုံနှစ်ပုံက ထောက်ခံရန်လိုအပ်သည်။ သို့သော်လည်း ယွန်း၏ ပါတီမှ အမတ်များက မဲပေးမှုမတိုင်မီတွင် လွှတ်တော်အစည်းအဝေးခန်းမမှ ထွက်ခွာကာ သပိတ်မှောက်ခဲ့ကြသဖြင့် စွပ်စွဲပြစ်တင်ခြင်းအတွက် အထမြောက်ရန်လိုအပ်သည့် အချက်များမပြည့်မီနိုင်တော့ပေ။
ပထမအကြိမ် အဆိုမအောင်မြင်ခဲ့ပါက ဗုဒ္ဓဟူးနေ့တွင် စွပ်စွဲပြစ်တင်မှုအတွက် ပြန်လည်သုံးသပ်မည်ဟု အတိုက်အခံအမတ်များက ပြောဆိုထားခဲ့သည်။
အကယ်၍ အဆိုအောင်မြင်ခဲ့ပါက ယွန်းသည် သူ၏ သမ္မတအခွင့်အာဏာကို ချက်ချင်းရုပ်သိမ်းစွန့်ခွာရမည်ဖြစ်သည်။ လက်ရှိသမ္မတကို ရာထူးမှ ထုတ်ပယ်ခြင်း သို့မဟုတ် နုတ်ထွက်ခြင်းဖြစ်ခဲ့ပါက ရက်ပေါင်း ၆၀ အတွင်း သမ္မတရွေးကောက်ပွဲ ကျင်းပရမည်ဖြစ်သည်။
