"အပြန်"
ဘာမှ မဆွတ်ခူးနိုင်တဲ့ လက်နှစ်ဖက်က
လက်အုပ်မချီဖြစ်တာလည်း
လက်နှစ်ဖက်စာ နှစ်များကြာ
အမျှော်တွေ လမ်းမတဆုံး ထားခဲ့နိုင်တာပဲရှိတယ်
ကိုယ်အညွန့်လေး တလူလူအတွက်
အမေ့အခက်အလက်လေးတွေ ချိုးချိုးပေးရ
"ဒီလောက်တောင်ပဲလား သားရယ် ... ပြန်ခဲ့ပါ" တဲ့
"အမေ ...
ယုံကြည်ချက်နဲ့မာနတရားဆိုတာ ဒီလိုရှိပါတယ်" ဆိုပြီး
ရသမျှဒုက္ခတွေ
အမေ့ဆီ ခဏခဏ ပြန်ရောင်းခဲ့
အမေပေးခဲ့သမျှတွေ
ဟောင်းနွမ်း ပျောက်ရှ ပျက်စီး ဆွေးမြေ့ပြီး
ကိုယ်ပေးခဲ့တဲ့ အမျှော်တွေသာ
ညနေတိုင်ရင် လမ်းမထွက်တဲ့ မျက်ရည်တွေဖြစ်
အခုတော့ စိတ်ညစ်ညစ်ရှိတိုင်း
အမေပုခက်နဲ့ လွှဲသိပ်သလို
မူးပြီးမှ အိပ်ပျော်တတ်လာတယ်
တကယ်တော့ ဘာမှမဟုတ်တဲ့မာနနဲ့
ဘာမှမယူနိုင်လည်း နေပါစေ
အမေကြိုက်တတ်တဲ့ ဆံပင်ပုံလေးညှပ်ပြီး
သပ်သပ်ရပ်ရပ် ပြန်လာတယ်ဆိုရင်ပဲ
ရင်ဘတ်ကလေး လက်နဲ့ဖိပြီး
ပြုံးပြုံးကြီး ကြည့်နေမယ်ဆိုတာ
သားသိပါတယ် အမေ ။
#သစ္စာပိုင်စိုး
