ဟားခါးမြို့မှာ ကုန်စျေးနှုန်းမြင့်တက်လို့ ဒေသခံတွေနဲ့ စစ်ဘေးရှောင်တွေ အထွေထွေကျပ်တည်းမှုဖြစ်
နိုဝင်ဘာလ ၂၇ ရက်
ချင်းပြည်နယ်၊ ဟားခါးမြို့မှာ ကုန်ပစ္စည်းအဝင်တွေနည်းပါးပြီး အခြေခံစားသောက်ကုန်တွေ စျေးမြင့်တက်သွားတဲ့အတွက် ဒေသခံတွေနဲ့ စစ်ဘေးရှောင်တွေ အထွေထွေကျပ်တည်းမှုနဲ့ ကြုံတွေ့နေကြရတယ်လို့ ဒေသခံတွေဆီက သိရပါတယ်။
ပြီးခဲ့တဲ့လတွေဖြစ်ပွားတဲ့ ဟားခါးမြို့ တိုက်ပွဲအခြေအနေကြောင့် ကုန်တင်ကားသမားတွေဟာ အရင်ကလို မရောက်လာနိုင်တော့တဲ့အတွက် အခြေခံစားသောက်ကုန်တွေ အဝင်နည်းပါးပြီး ကုန်စျေးနှုန်းတွေ မြင့်တက်သွားခြင်းဖြစ်ပါတယ်။
"တိုက်ပွဲဖြစ်တော့ ကားလမ်းတွေ ပိတ်လိုက်၊ ဖွင့်လိုက်နဲ့ ပြီးတော့ ပြည်မဘက်က ကားသမားတွေ မလာရဲကြဘူး။ ဒေသခံကားသမားတချို့လောက်ပဲ ရောက်နိုင်တယ်။ အဲ့လိုဆိုတော့ ကုန်ပစ္စည်းအဝင်က နည်းသွားပြီး ကုန်စျေးနှုန်းတွေ တက်သွားတယ်"လို့ ဒေသခံတစ်ဦးက ပြောပါတယ်။
ဟားခါးမြို့မှာ အခြေခံစားသောက်ကုန်တွေ အဝင်နည်းပါးလာတဲ့အတွက် စားသောက်ကုန်တွေ အရင်ကလိုမျိုး ဝယ်ယူလို့မရတော့ပဲ ရှိတဲ့စားသောက်ကုန်တွေကလည်း အရင်ကထက် စျေးမြင့်တက်သွားတယ်လို့ သိရပါတယ်။
အဲ့ဒီလို အခြေခံစားသောက်ကုန်တွေ စျေးမြင့်တက်သွားတဲ့အတွက် ဟားခါးဒေသခံတွေနဲ့ ပလက်ဝ၊ တီးတိန်၊ ထန်တလန်၊ ဖလမ်းစတဲ့မြို့တွေက ဟားခါးမှာစစ်ဘေးရှောင်ကြတဲ့ စစ်ဘေးရှောင်ဟာ စားဝတ်နေရေး၊ ကျန်းမာရေးနဲ့တခြား အထွေထွေကျပ်တည်းလာပါတယ်။
"အလုပ်အကိုင်လည်းရှားပါလာတော့ လူတွေက ပုံမှန်ဝင်ငွေမရှိဘူး။ ရတဲ့ဝင်ငွေကလည်း လက်ရှိကုန်စျေးနှုန်းနဲ့ မိသားစုစားဝတ်နေရေး မလောက်ဘူးဖြစ်နေတယ်။ နေ့စဥ်နဲ့အမျှကုန်စျေးနှုန်းတွေ တက်လာတယ်"လို့ စစ်ဘေးရှောင်တစ်ဦးက ပြောပါတယ်။
လက်ရှိ ဟားခါးမြို့ ကုန်စျေးနှုန်းမှာ ဆန်အမျိုးအစားပေါ်မှုတည်ပြီး တအိတ်ကို ၈၀,၀၀၀ ကျပ်ကနေ ၁၀၀,၀၀၀ကျပ်၊ ဝက်သား တပိဿာ ၃၅,၀၀၀ ကျပ်၊ ကြက်သား တပိဿာ ၃၂,၀၀၀ ကျပ်၊ ကြက်သွန်နီ တပိဿာ ၈၀၀၀ ကျပ်၊ အမဲသား တပိဿာ ၃၀,၀၀၀ ကျပ်၊ အာလူး တပိဿာ ၁၀,၀၀၀ ကျပ်၊ ကုလားပဲ တပိဿာ ၁၂,၀၀၀ ကျပ်၊ ကြက်သွန်နီ တပိဿာ ၈၀၀၀ ကျပ်ထိရှိပါတယ်။
#centralnewsnaypyitaw
