စိန်နားပန်မီးပုံးပျံဖြင့်လွှတ်တင်ပူဇော်ယှဉ်ပြိုင်ခဲ့သည့် MOFA
နေပြည်တော်၊ ဒက္ခိဏသီရိမြို့နယ်ရှိ မာရဝိဇယ ဗုဒ္ဓရုပ်ပွားတော်မြတ်ကြီး၏ ဗုဒ္ဓဥယျာဉ်တော်အတွင်း၌ ယနေ့ နိုဝင်ဘာ ၁၃ ရက်ညပိုင်းကကျင်းပသည့် တန်ဆောင်တိုင်ပွဲတော် မီးပုံးပျံလွှတ်တင်ပူဇော်ခြင်းပြိုင်ပွဲတွင် နိုင်ငံခြားရေးဝန်ကြီးဌာန (MOFA)မှ စိန်နားပန်မီးပုံးပျံဖြင့် လွှတ်တင်ပူဇော်ယှဉ်ပြိုင်ခဲ့ကြောင်း သိရသည်။
MOFA ၏ပြည်ထောင်စုဝန်ကြီးဦးဆောင်ကာ ဝန်ထမ်းများက စိန်နားပန်မီးပုံးပျံအား အတူတကွလွှတ်တင်ပူဇော်ယှဥ်ပြိုင်ခဲ့ကြပြီးနောက် ရောင်စုံမီးပုံးပျံသေးအလုံး(၁၀၀)ကိုလည်း လွှတ်တင်ပူဇော်ခဲ့ကြသည်။
MOFA မှလွှတ်တင်ပူဇော်သည့် စိန်နားပန်မီးပုံးပျံ ၏ အောက်ခံအရောင်အား အဖြူရောင်အသုံးပြုထားပြီး မီးပုံးပျံအပေါ်ဘက်နှင့်အောက်ဘက်တို့တွင် နိုင်ငံတော်အလံပါအရောင်များနှင့် MOFA ကိုယ်စားပြုသည့် ဝါ၊ စိမ်း၊ နီ၊ ပြာ အရောင်များအသုံးပြု၍ “နိုင်ငံခြားရေး”စာသားအား အပြာရောင်၊ မီးပုံးပျံကိုယ်ထည်တွင် လောကနတ်ပုံ၊ မီးပုံးပျံအောက်ဘက်တွင် MOFA စာတမ်းတို့ကို ချိတ်ဆွဲအလှဆင်ထားသည်။
