တနင်္သာရီတိုင်းအတွင်းရှိ ဘုရားထံ(ဌာန်) ကျောက်တောင်ဂူအား ထိန်းသိမ်းရေး လုပ်ဆောင်ရန် လိုအပ်နေ
တနင်္သာရီတိုင်း၊ ဘုတ်ပြင်းမြို့နယ်၊ လေညာသစ်တောကြိုး ဝိုင်းအတွင်းရှိ ဘုရားထံ(ဌာန်) ကျောက်တောင်ဂူကိုထိန်းသိမ်းရေး လုပ်ဆောင်ရန် လိုအပ်နေကြောင်း သိရသည်။
ယင်းဂူသည် ရှားပါးမျိုးစိတ်များဖြစ်သည့် တောင်ငုံးရင်မည်း၊ အောက်ချင်း၊ အောင်လောင်၊ အောက်ချင်းမြီးရှည် (ငှက်မင်းသား)မျိုးစိတ်တို့ ကျက်စားတတ်သည့် ကျောက်တောင်ဂူတခုဖြစ်ကြောင်းလည်း ဇီဝမျိုးစုံမျိုးကွဲနှင့် သဘာဝ ထိန်းသိမ်းရေး (BANCA) အဖွဲ့က ထုတ်ပြန်ချက်တွင် ပြောသည်။
လက်ရှိတွင် ယင်းဂူအနီးထိ အဆောက်အဦးများ ချဲ့ထွင်လာခြင်း၊ ခဲမိုင်းအလွန်အကျွံ့တူးဖော်ခြင်းနှင့် သစ်ထုတ်လုပ်မှုများကြောင့် ပျက်စီးခြင်းများ ဖြစ်ပေါ်နေကာ ထိန်းသိမ်းရေးလုပ်ငန်းများဆောင်ရွက်ရန် လိုအပ်နေကြောင်းလည်း (BANCA) အဖွဲ့က ထုတ်ပြန်ချက်တွင် ဖော်ပြသည်။
ထို့အပြင် အထက်ပါဂူသည် ဆင်နှင့် ကျားကဲ့သို့ နို့တိုက်သတ္တဝါ မျိုးစိတ်များ အတွက်လည်း မှီခိုနေထိုင်ရာဂေဟစနစ်တစ်ခု ဖြစ်နေကြောင်း ထုတ်ပြန်ချက်အရ သိရသည်။
