ကမ္ဘာ့ကာယဗလပြိုင်ပွဲတွင် ရွှေတံဆိပ်ရရှိခဲ့သည့် ရဲထွန်းနောင်ပါဝင်သည့် မြန်မာအားကစားအဖွဲ့ပြန်လည်ရောက်ရှိ
မော်ဒိုက်နိုင်ငံ၌ကျင်းပခဲ့သည့် (၁၅)ကြိမ်မြောက်ကမ္ဘာ့ကာယဗလနှင့်ကာယကြံ့ခိုင်မှုအားကစားပြိုင်ပွဲတွင် ရွှေတံဆိပ်ရရှိခဲ့သည့် ရဲထွန်းနောင်ပါဝင်သည့် မြန်မာအားကစားအဖွဲ့ ယနေ့ နိုဝင်ဘာ ၁၂ ရက်နံနက်ပိုင်းက ရန်ကုန်လေဆိပ်သို့ပြန်လည်ရောက်ရှိလာခဲ့ကြောင်း သိရသည်။
အဆိုပါ (၁၅)ကြိမ်မြောက်ကမ္ဘာ့ကာယဗလနှင့် ကာယကြံ့ခိုင်မှုအားကစားပြိုင်ပွဲအား မော်ဒိုက်နိုင်ငံ၊ Addu City ၌ ပြိုင်ပွဲအမျိုးအစား(၅၀)ဖြင့် နိုဝင်ဘာ ၅ ရက်မှ ၁၁ ရက်အထိ မြန်မာနိုင်ငံအပါအဝင် နိုင်ငံပေါင်း(၄၀)မှ ကစားသမားပေါင်း (၃၇၇)ဦးက ဝင်ရောက်ယှဥ်ပြိုင်ခဲ့ကြသည်။
ယင်း ပြိုင်ပွဲများ၌ မြန်မာကာယဗလနှင့်ကာယကြံ့ခိုင်မှုအားကစားသမား ရဲထွန်းနောင်သည် နိုဝင်ဘာ ၉ ရက်ကပြုလုပ်သည့် အမျိုးသားကာယဗလ(၇၅) ကီလိုတန်းတွင် ဝင်ရောက်ယှဉ်ပြိုင်ခဲ့ပြီးနောက် ပထမ(ရွှေတံဆိပ်ဆု)ကို ဆွတ်ခူးရရှိခဲ့သည်။
ရန်ကုနိလေဆိပ်သို့ပြန်လည်ရောက်ရှိလာသည့် မြန်မာအားကစားအဖွဲ့အား ရန်ကုန်မြို့တော်စည်ပင် အတွင်းရေးမှူးဦးညွန့်ဖေ၊ အားကစားနှင့်ကာယပညာဦးစီးဌာနမှတာဝန်ရှိသူများ၊ အား/ကာသိပ္ပံ(ရန်ကုန်)ကျောင်းအုပ်ကြီးနှင့်တာဝန်ရှိသူများကဂုဏ်ပြုကြိုဆိုခဲ့ကြကြောင်း သိရသည်။
