ဒဏ်ရာတွေကြောင့် ကစားသမား ၈ ဦး အင်္ဂလန်လူစာရင်းကနေ နုတ်ထွက်

နိုဝင်ဘာ ၁၂

အင်္ဂလန်အသင်းရဲ့ကစားသမား ၈ ဦးဟာ ဒဏ်ရာတွေကြောင့် ဒီလထဲ နေးရှင်းလိဂ်ပွဲတွေ ယှဉ်ပြိုင်ကစားမယ့် နိုင်ငံအသင်း လူစာရင်းကနေ နုတ်ထွက်ခဲ့ပါတယ်။

ဒီကစားသမားတွေကတော့ ဆာကာ၊ ကိုးလ်ပါလ်မာ၊ ဒီကလန်ရိုက်စ်၊ ဂရီလစ်ရှ်၊ အာနိုးလ်၊ ဖိုဒန်၊ ကိုဝဲလ်နဲ့ ရမ်စဒေးလ်တို့ဖြစ်ပြီး သူတို့တွေဟာ ဂရိ၊ အိုင်ယာလန်အသင်းတို့နဲ့ ကစားမယ့်ပွဲတွေမှာ အင်္ဂလန်အသင်းအတွက် ပါဝင်နိုင်တော့မှာ မဟုတ်ပါဘူး။

ဆာကာနဲ့ ဒီကလန်ရိုက်စ်တို့ဟာ ချယ်လ်ဆီးနဲ့ အာဆင်နယ်အသင်းတို့ ၁ ဂိုးစီ သရေကျခဲ့တဲ့ ပွဲစဉ်မှာ ဒဏ်ရာရ ရှိခဲ့ပြီး လီဗာပူးလ်အသင်း နောက်ခံလူ အာနိုးလ်က အက်စတွန်ဗီလာအသင်းကို အနိုင်ရခဲ့တဲ့ပွဲစဉ်ရဲ့ ပွဲချိန် ၂၅ မိနစ်မှာ ဒဏ်ရာကြောင့် လူစားလဲခံခဲ့ရတာဖြစ်ပါတယ်။

ဂရီလစ်ရှ်ဟာ အောက်တိုဘာ ၂၀ ရက်ကတည်းက မန်စီးတီးအသင်းအတွက် ပွဲမကစားနိုင်ခဲ့တာဖြစ်ပြီး ဆောက်သမ်တန်အသင်း ဂိုးသမား ရမ်စဒေးလ်က ဝုလ်ဗ်စ်အသင်းနဲ့ပွဲစဉ်မှာ လက်ချောင်းကျိုးခဲ့တယ်လို့ သိရတာပါ။

ဖိုဒန်၊ ကိုးလ်ပါလ်မာနဲ့ ကိုဝဲလ်တို့ကတော့ ပြီးခဲ့တဲ့ ပရီးမီးယားလိဂ်ပွဲစဉ်မှာ သူတို့ရဲ့ ကလပ်တွေအတွက် ပွဲချိန်ပြည့် ပါဝင်ကစားခဲ့ပေမယ့် ဒဏ်ရာတွေကြောင့် အင်္ဂလန်အသင်း လူစာရင်းကနေ နုတ်ထွက်ခဲ့ပါတယ်။

အင်္ဂလန်အသင်းဟာ ထွက်ခွာခဲ့တဲ့ သူတို့တွေရဲ့နေရာမှာ ဗီလာကွင်းလယ်လူ ရော်ဂျာစ်၊ ဝက်စ်ဟမ်းတောင်ပံ ကစားသမား ဘိုဝင်၊ အဲဗာတန်နောက်ခံလူ ဘရန်ဝိတ်၊ နယူးကာဆယ် နောက်ခံလူ လီဗရာမန်တိုနဲ့ ဘန်လေ ဂိုးသမား ဂျိမ်းစ်ထရက်ဖို့ဒ်တို့ကို ခေါ်ယူအားဖြည့်ခဲ့တာပါ။

လီကာစလေဟာ အင်္ဂလန်အသင်းကို ယာယီနည်းပြအဖြစ် နောက်ဆုံး ကိုင်တွယ်မယ့် ပွဲစဉ်တွေမှာ အဓိက ကစားသမား အများအပြား ထွက်ခွာမှုကြောင့် လူစာရင်း အားနည်းမှုနဲ့ ရင်ဆိုင်ရနိုင်ပါတယ်။

အင်္ဂလန်အသင်းဟာ နေးရှင်းလိဂ်အုပ်စု B ရဲ့ နောက်ဆုံးပွဲစဉ်တွေအဖြစ် နိုဝင်ဘာ ၁၄ ရက်မှာ ဂရိအသင်းနဲ့ အဝေးကွင်း၊ ၁၇ ရက်မှာ အိုင်ယာလန်အသင်းနဲ့ အိမ်ကွင်းပွဲစဉ်ယှဉ်ပြိုင်ရမှာ ဖြစ်ပါတယ်။

Source: ESPN

ပုံ - အင်္ဂလန်အသင်း ကစားသမားများကိုတွေ့ရစဉ်

#သတင်းဟင်းလေးအိုးကြီး