ငါးချိုချဉ်ကြော်ကို အရင်က မတူတဲ့ ပုံစံတစ်မျိုးနဲ့ တင်ထားပြီးသားရှိပါတယ်။ အခုကြော်ထားတာက ယိုးဒယားချိုချဉ်ကြော် ပုံစံလေးပါ။ အရသာမတူဘဲ ထူးခြားတဲ့အရသာလေးမို့ ချိုချိုချဉ်ချဉ်ကြိုက်သူများအတွက် လွယ်ကူတဲ့ ချက်နည်းလေး မျှဝေပေးလိုက်ပါတယ်။
ပါဝင်ပစ္စည်းများ
နှစ်သက်ရာ ငါး - ၂ ကောင် (၂၀ ကျပ်သားခန့်)
ကော်မှုန့်/ ပြောင်းဖူးမှုန့် - စားပွဲဇွန်း ၃ ဇွန်း
ကြက်သွန်နီ - ၁ လုံး
ကြက်သွန်ဖြူ - ၃ မွှာ
ချယ်ရီခရမ်းချဉ်သီး - ၁၀ လုံး
ခရမ်းချဉ်သီးဆော့စ် - ၂ ဇွန်း
Apple Cider - ၂ ဇွန်း (ရှာလကာရည်၊ သံပုရာသီး)
သကြား - ၂ ဇွန်း
ယိုးဒယားသံပုရာရည်- ၁ ဇွန်း
ရေ - အနည်းငယ်
ကြက်သွန်မြိတ်/ နံနံပင် - အနည်းငယ်
ချင်း - အနည်းငယ်
ပြုလုပ်နည်း
၁။ ငါးကို ရေဆေးသန့်စင်ပြီး ရေစစ်ထားပါ။ ကော်မှုန့် ၂ ဇွန်းဖြင့် ငါးတစ်ကောင်လုံးနှံ့အောင် လူးပေးပါ။
၂။ ကြက်သွန်နီ၊ ကြက်သွန်ဖြူနှင့် ချင်းကို ပါးပါးစိတ်ထားပါ။
၃။ အိုးထဲ ဆီထည့်၍ အပူပေးပြီး ကော်မှုန့်လူးထားသော ငါးကို အရောင်အနည်းငယ် ရသည်အထိ နှစ်ဖက်လှန်ကြော်ပြီး ဆယ်ယူ၍ ဆီစစ်ထားပါ။
၄။ ငါးကြော်သည့်အိုးထဲမှ ဆီများကို ဖယ်ထုတ်ပြီး လက်ကျန်ဆီအနည်းငယ်ဖြင့် ကြက်သွန်နီ၊ ကြက်သွန်ဖြူနှင့် ချင်းတို့ကို ဆီသတ်ပါ။
၅။ အရောင်ရလာပါက ခရမ်းချဉ်သီး အလုံးလိုက် ထည့်ကြော်ပါ။
၆။ ခရမ်းချဉ်သီးလေးများ နွမ်းသွားပါက ခရမ်းချဉ်သီးဆော့စ် Apple Cider (သို့) သံပုရာရည်၊ သကြားနှင့် ငံပြာရည်တို့ကို ထည့်ပြီးမွှေပါ။
၇။ လက်ကျန်ကော်မှုန့် ၁ ဇွန်းကို ရေအနည်းငယ်ဖြင့် ဖျော်ပြီး ဟင်းအိုးထဲထည့်ကာ ခပ်ပျစ်ပျစ်အနေအထားရအောင် မွှေပါ။
၈။ အရသာပေါ့အငန် မြည်းကာ ဆီစစ်ထားသောငါးကို ပန်းကန်မှာ တည်ခင်းပြီး အပေါ်မှ ချက်ထားသောဆော့စ်များ လောင်း၍ ကြက်သွန်နီ၊ နံနံပင်တို့ဖြငိ့ တည်ခင်းသုံးဆောင်နိုင်ပါပြီ
