မြန်မာ့လက်ရွေးစင်အမျိုးသားအသင်း ဖီဖာနိုင်ငံတကာ ခြေစမ်းပွဲကစားမည်
နိုဝင်ဘာ (၁၄) ရက်တွင် ပြုလုပ်မည့် ဖီဖာ နိုင်ငံတကာ ခြေစမ်းပွဲအတွက် မြန်မာ့လက်ရွေးစင်အမျိုးသားအသင်း အနေဖြင့် ယမန်နေ့ နိုဝင်ဘာ (၉) ရက်က စတင်လေ့ကျင်ပြင်ဆင်မှုများ ပြုလုပ်လျှက်ရှိကြောင်း မြန်မာ့လက်ရွေးစင်အသင်းက အသိပေးထုတ် ပြန်သည်။
မြန်မာ့လက်ရွေးစင်အသင်းအနေဖြင့် နိုဝင်ဘာ (၁၄) ရက်တွင် စင်ကာပူအသင်းနှင့် အဝေးကွင်း ယှဉ်ပြိုင်ကစားရမည်ဖြစ်ပြီး၊ နိုဝင်ဘာ (၁၉) ရက်တွင် လက်ဘနွန် အသင်းနှင့် အိမ်ကွင်း၌ ယှဥ်ပြိုင် ကစားသွားကြရမည် ဖြစ်သည်။
မြန်မာ့လက်ရွေးစင်အသင်းသည် ပြီးခဲ့သော အောက်တိုဘာ (၁၀) ရက်နှင့် (၁၃) ရက်တွင် ရန်ကုန်မြို့ သုဝဏ္ဏအားကစားကွင်းအတွင်း သီရိလင်္ကာ လက်ရွေးစင်အသင်းနှင့် ခြေစမ်းပွဲနှစ်ကျော့ ယှဉ်ပြိုင်ကစားခဲ့ကြသေးသည်။
ယခုနှစ် ဖီဖာက ကျင်းပပြုလုပ်သည့် နိုင်ငံ တကာခြေစမ်းပွဲစဉ်များအား မြန်မာ့လက်ရွေးစင် အမျိုးသားအသင်း ၊ မြန်မာ့လက်ရွေးစင် အမျိုးသမီးအသင်းနှင့် ယူ-၁၇အမျိုးသား အသင်းတို့ ဝင်ရောက်ယှဉ်ပြိုင်လျှက်ရှိသည်။
ပြီးခဲ့သည့် အောက်တိုဘာလ အတွင်းက ယှဉ်ပြိုင်ကစားခဲ့သော သီရိလင်္ကာနှင့်ပွဲစဉ်တွင် ပြည်ပသို့ ထွက်၍ ကစားနေကြသည့် တိုက်စစ်မှူးများဖြစ်သည့် သန်းပိုင်၊ ဝင်းနိုင်ထွန်း၊ လွင်မိုးအောင်၊ ကျော်မင်းဦး၊ ဟိန်းထက်အောင်၊ မောင်မောင်လွင်၊ စိုးမိုးကျော်တို့ ကို ထည့်သွင်းကစားထားသည်ကိုတွေ့ရသည်။
