စက်မှုဇုန်အဆင့်အတန်းတစ်ပြေးညီသတ်မှတ်နိုင်ရန် အချက်(၅)ချက်ကိုအခြေခံစစ်ဆေးရမည်
ပြည်တွင်းရှိစက်မှုဇုန်များအား စက်မှုဇုန်အဆင့်အတန်း တစ်ပြေးညီသတ်မှတ်နိုင်ရေးနှင့်ပတ် သက်၍ စက်မှုဝန်ကြီးဌာန ပြည်ထောင်စုဝန်ကြီး ဒေါက်တာချာလီသန်းမှ ယမန်နေ့ နိုဝင်ဘာ ၉ ရက်နံနက်ပိုင်းက မန္တလေးတိုင်းစက်မှုကြီးကြပ်ရေးနှင့်စစ်ဆေးရေးဦးစီးဌာန၏ တာဝန်ရှိသူများနှင့်တွေ့ဆုံစဥ်မှာကြားခဲ့ခြင်းဖြစ်သည်။
ပြည်တွင်းရှိစက်မှုဇုန်များအား စက်မှုဇုန်အဆင့်အတန်း တစ်ပြေးညီသတ်မှတ်နိုင်ရန် နည်းဥပဒေတွင် မြေအသုံးချမှုအင်္ဂါရပ်များနှင့်ကိုက်ညီခြင်း ၊ အကောက်ခွန်ကြီးကြပ်မှု၊ ကုန်လှောင်ရုံစနစ်ပါ ရှိခြင်း၊ ပတ်ဝန်းကျင်ထိန်းသိမ်းရေးဥပဒေ/နည်း ဥပဒေများ၊ ပတ်ဝန်းကျင်ထိခိုက်မှုဆန်းစစ်ခြင်းဆိုင်ရာလုပ်ထုံးလုပ်နည်းများနှင့်အညီ လိုက်နာဆောင်ရွက်ခြင်း၊ အခြေခံအဆောက်အအုံများ ပြည့်စုံစွာပါရှိခြင်း၊ အထူးစီးပွားရေးဇုန်များ၊ အခြားစီးပွားရေးဇုန်များနှင့် ချိတ်ဆက်ဆောင်ရွက်နိုင်ခြင်းစသည့်အချက်ငါးချက်ကိုအခြေခံ၍ စစ်ဆေးရမည်ဟု မှာကြားသည်။
ထို့ပြင် အခြေခံအချက်(၅)ချက်နှင့်ပတ်သက်သည့် အချက်ခွဲများအလိုက် အမှတ်ပေးမှုစနစ်များကို ပြန်လည်ညှိနှိုင်းဆောင်ရွက်ပေးရမည်ဖြစ်ကာ စက်မှုလုပ်ငန်းများစနစ်တကျဖွံ့ဖြိုး တိုးတက်ရန် ကြီးကြပ်ဆောင်ရွက်ရမည်ဖြစ်၍ တစ်ဦးချင်းစီ၏ စွမ်းဆောင်ရည်များမြင့်မားတိုးတက်ရေးအတွက် စဉ်ဆက်မပြတ်လေ့လာသင်ယူကာ ပေးအပ်သည့်လုပ်ငန်းတာဝန်များကို အဂတိတရားကင်းကင်းဖြင့် ကျေပွန်စွာထမ်းဆောင်ရမည်ဟု မှာကြားသည်။
ထို့အတူ ပြဋ္ဌာန်းထားသည့် ဥပဒေများနှင့်အညီ လျှပ်စစ်ကြောင့် ထိခိုက်ဆုံးရှုံးမှုမရှိစေရေး၊ ဘွိုင် လာများ စွမ်းအားပြည့်အသုံးပြုနိုင်ရေး၊ စက်မှုလုပ်ငန်းများ စနစ်တကျဖွံ့ဖြိုးတိုးတက်ရေးတို့အတွက် ကြပ်မတ်စစ်ဆေးလျက်ရှိ၍ စက်မှုလုပ်ငန်းများကြောင့် ပတ်ဝန်းကျင်ထိခိုက်မှုမရှိစေရေးကို အလေးထားဆောင်ရွက်ပေးရမည်ဟုလည်း မှာကြားခဲ့သည်။
ပြည်ထောင်စုဝန်ကြီးအား စက်မှုလုပ်ငန်းများ၊ စက်မှုဇုန်များဖွံ့ဖြိုးတိုးတက်ရေးဆောင်ရွက်နေမှု၊ စက်မှုဇုန်ဥပဒေပါပြဋ္ဌာန်းချက်အရ စက်မှုဇုန်အရွယ်အစား၊ စက်မှုဇုန်အမျိုးအစား၊ စက်မှုဇုန်အဆင့်အတန်းသတ်မှတ်နိုင်ရေးအတွက် မြေပြင်ကွင်းဆင်းဆောင်ရွက်ခဲ့မှုတို့ကို စက်မှုကြီးကြပ်ရေးနှင့်စစ်ဆေးရေးဦးစီးဌာန ညွှန်ကြားရေးမှူးချုပ်နှင့် တိုင်းဦးစီးဌာနမှူးတို့က ရှင်းလင်းတင်ပြခဲ့ကြသည်။
