Myanmar Women League 2024 သွင်းဂိုးအများဆုံးဆု ရယူသွားမည်ဟု ISPE အသင်းတိုက်စစ်မှူး လင်းမြင့်မိုရ် ပြော
Myanmar Women League 2024 အမှန်ပေးဘောလုံးပြိုင်ပွဲအပြီး သွင်းဂိုးအများဆုံးဆု ရယူသွားမည်ဟု ISPE အသင်းတိုက်စစ်မှူး လင်းမြင့်မိုရ်က နိုဝင်ဘာ (၈) ရက်တွင်ပြောကြားသည်။
"ဒီနှစ် ISPE အသင်းအတွက် ဂိုးသွင်းအများဆုံးဆု ယူပေးဖို့ စီစဉ်ထားပါတယ်။ ရမယ်လို့လဲ ယူဆထားပါတယ်" ဟု ၎င်းက ဆိုသည်။
တိုက်စစ်မှူး လင်းမြင့်မိုရ် ကစားနေသည့် ISPE အသင်းသည် နောက်ဆုံးပွဲစဉ်အဖြစ် ရန်ကုန်ယူနိုက်တက်အသင်းနှင့် ကစားကြရဦးမည်ဖြစ်ရာ ထိုပွဲစဉ် အတွင်း ၎င်းအနေဖြင့် သွင်းဂိုးထပ်မံ ရရှိပါက ယခုနှစ်အတွက် သွင်းဂိုးအများဆုံး သွင်းယူနိုင်သည့် ကစားသမားဆုကို ဆွတ်ခူးမည်ဖြစ်သည်။
လက်ရှိတွင် ၎င်းအနေဖြင့် ပွဲစဉ်တလျှောက် သွင်းဂိုး (၁၉) ဂိုးသွင်းယူထားနိုင်သလို ၎င်းနှင့်အပြိုင် ဧရာဝတီအသင်း တိုက်စစ်မှူး စန်းသော်သော်ကလည်း သွင်းဂိုး (၁၉) ဂိုးသွင်းယူထားသည်။
သို့သော် ဧရာဝတီအသင်းအနေဖြင့် ပြိုင်ပွဲဝင်ရန် မရှိတော့သည့်အတွက် တိုက်စစ်မှူး စန်းသော်သော်မှာ သွင်းဂိုး(၁၉) ဂိုးဖြင့် ရပ်တန့်ခဲ့ရသည်။
ပြီးခဲ့သည့် Myanmar Women League 2023 အမှတ်ပေးဘောလုံးပြိုင်ပွဲတွင် ဂိုးသွင်းအများဆုံးဆုကို ISPE အသင်းမှ ခင်မာလာထွန်းနှင့် မြဝတီ( ယခု ဧရာဝတီ အသင်း)မှ စန်းသော်သော်တို့က သွင်းဂိုး (၁၆) ဂိုးစီဖြင့် ပူးတွဲရရှိခဲ့ကြသည်။
