တန်ဆောင်တိုင်ဈေးရောင်းပွဲတော်တွင် မြေပဲဆီနှင့် နှမ်းဆီများကို လွတ်လပ်စွာ ဝယ်ယူနိုင်
မြန်မာနိုင်ငံဆီစက်ပိုင်ရှင်များအသင်းက ကြီးမှူးကျင်းပသည့်တန်ဆောင်တိုင်ဈေးရောင်းပွဲတော်တွင် မြေပဲဆီနှင့် နှမ်းဆီများကို
လွတ်လပ်စွာ ဝယ်ယူနိုင်ကြောင်း သိရသည်။
ယင်းပွဲတော်ကို နိုဝင်ဘာလ ၉ ရက်မှ ၁၁ ရက်နေ့အထိ ရန်ကုန်မြို့၊ လမ်းမတော်မြို့နယ်၊ မင်းရဲကျော်စွာလမ်းနှင့် ဇော်ဂျီလမ်းထောင့်၌ နံနက် ၉ နာရီမှ ညနေ ၅ နာရီအထိ ကျင်းပသွားမည်ဖြစ်သည်။
မြေပဲဆီနှင့် နှမ်းဆီများကို တန်ဆောင်တိုင်စျေးရောင်းပွဲတော်တွင် တစ်ပိဿာလျှင် အမြင့်ဆုံးဈေး ကျပ်တစ်သောင်းခြောက်ထောင်ထက်မပိုသည့် ဈေးဖြင့် ရောင်းချပေးမည်ဖြစ်ကြောင်းလည်း သိရသည်။
ထိုသို့ဝယ်ယူရာတွင်လည်း စိတ်ကြိုက်လိုသလောက် ၅၀ ကျပ်သားဘူးမှစကာ ပိဿာဘူးများအထိ ရောင်းချပေးသွားမည်ဖြစ်ကာ ပထမအကြိမ် ဈေးရောင်းပွဲတော်၌ မြေပဲဆီ တစ်ပိဿာကို ကျပ်တစ်သောင်းခွဲနှင့် သုံးရက်အတွင်း ဆီပိဿာချိန် ခြောက်သောင်းကျော် ရောင်းချခဲ့ရသည်ဟု သိရှိရသည်။
ထို့အပြင် ပွဲတော်ရက်အတွင်း ဆီပိဿာချိန်များများယူလျှင် ရန်ကုန်မြို့အတွင်း ပို့ဆောင်ပေးမည်ဖြစ်ပြီး ပို့ဆောင်ခကိုမူ မှာယူသူက ပေးဆောင်ရမည်ဖြစ်သည်ဟုလည်း သိရသည်။
ယင်း ဈေးရောင်းပွဲတော်တွင် မန္တလေးတိုင်းဒေသကြီးမှ ဆီစက်လုပ်ငန်းရှင် ၉ ဦး၊ မကွေးတိုင်းဒေသကြီးမှ ၄ ဦး၊ စစ်ကိုင်းတိုင်းဒေသကြီးမှ ၁ ဦး လာရောက်ရောင်းချမည်ဖြစ်ကြောင်းလည်း သိရသည်။
