တရုတ် - မြန်မာ နှစ်နိုင်ငံ ခရီးသွားကဏ္ဍ အပြန်အလှန်ကူးလူးဖလှယ်ခြင်း နှင့် ပူးပေါင်းဆောင်ရွက်ခြင်းကို ဆက်လက်တိုးမြှင့်မည်
တရုတ် - မြန်မာနှစ်နိုင်ငံခရီးသွားကဏ္ဍတွင် အပြန်အလှန်ကူးလူးဖလှယ်ခြင်း နှင့် ပူးပေါင်းဆောင်ရွက်ခြင်းကို ဆက်လက်တိုးမြှင့်ခြင်းဖြင့် အစဉ်အလာ ချစ်ကြည်ရေးကို ခိုင်မာစေမည်ဟု မျှော်လင့်ကြောင်း ဟိုတယ်နှင့် ခရီးသွားလာရေးဝန်ကြီးဌာန ပြည်ထောင်စုဝန်ကြီး ဒေါက်တာသက်သက်ခိုင်က ပြောကြားခဲ့သည်။
မြန်မာနိုင်ငံ ဟိုတယ်နှင့်ခရီးသွားလာရေးလုပ်ငန်း ဝန်ဆောင်မှုအရည်အသွေး မြှင့်တင်ရေး သင်တန်းများဖွင့်ပွဲအခမ်းအနားနှင့် မြန်မာနိုင်ငံတွင် တရုတ်ခရီးသွားစျေးကွက် မြှင့်တင်ရေး ဆွေးနွေးပွဲတွင် ထည့်သွင်းပြောကြားခဲ့ခြင်းဖြစ်သည်။
ပြည်ထောင်စုဝန်ကြီးက မြန်မာနိုင်ငံ၏ ခရီးသွားလုပ်ငန်း ဖွံ့ဖြိုးတိုးတက်မှုအပေါ် တရုတ်နိုင်ငံ၏ ဂရုပြုမှုနှင့် ပံ့ပိုးကူညီမှုအတွက် ကျေးဇူးတင်ရှိကြောင်း၊ နှစ်နိုင်ငံ ခရီးသွားကဏ္ဍတွင် အပြန်အလှန်ကူးလူးဖလှယ်ခြင်း နှင့် ပူးပေါင်းဆောင်ရွက်ခြင်းကို ဆက်လက်တိုးမြှင့်ခြင်းဖြင့် အစဉ်အလာ ချစ်ကြည်ရေးကို ခိုင်မာစေမည်ဟု မျှော်လင့်ကြောင်းပြောကြားခဲ့သည်။
အလားတူ အခမ်းအနားသို့တက်ရောက်လာသည့် တရုတ်သံမှူး Mr. Li Qianguo ကလည်း တရုတ်နိုင်ငံ၏ ခရီးသွားလုပ်ငန်း ဖွံ့ဖြိုးတိုးတက်မှု အခြေအနေ နှင့် ခရီးသွားလုပ်ငန်းမြှင့်တင်ရေးမူဝါဒများကို ရှင်းလင်းပြောကြားခဲ့သည်။
ထို့ပြင် Air China အရောင်းကိုယ်စားလှယ်မှ အပြည်ပြည်ဆိုင်ရာနှင့်ဒေသတွင်း လေကြောင်းခရီးစဉ်များကို မိတ်ဆက်ပေးခဲ့ကြောင်း သိရသည်။
မြန်မာနိုင်ငံဒေသအသီးသီးမှ သင်တန်းသား သင်တန်းသူပေါင်း (၂၄၀) ကျော် တက်ရောက်မည့် အဆိုပါသင်တန်းများကို တရုတ်နိုင်ငံ ကျေးလက်ဒေသ ဖွံ့ဖြိုးတိုးတက်ရေး ဖောင်ဒေးရှင်း (CFRD) မှအရင်းအနှီးထည့်ဝင် ကူညီစီစဥ်၍ ရက်ပေါင်း (၂၀) ကြာ သင်ကြားပေးသွားမည်ဖြစ်ကြောင်း သိရသည်။
