"အမိုက်မှောင်ကို ပယ်ခွင်း ဓမ္မအလင်းဆီမီးရောင်"
အိန္ဒိယနှင့် မြန်မာနိုင်ငံအကြား အပြန်အလှန်ကူးလူးဆက်ဆံသွားလာမှုများမှာ နှစ်ပေါင်းထောင်ချီ ကြာမြင့်ပြီဖြစ်သည့်အလျောက် အခြေချနေထိုင်မှုများရှိသလို ယဉ်ကျေးမှုများ ပေါင်းစည်းမှုများလည်း ရှိခဲ့သည်။ မြန်မာစကားတွင် ဟိန္ဒူဝေါဟာရအများအပြားကို ယူငင်သုံးစွဲရာမှ ကာလကြာမြင့်လာသည့်အခါ မြန်မာဝေါဟာရသဖွယ် ဖြစ်လာသည်။ ဟိန္ဒူဘာသာဝင်တို့၏ ဒီပါဝလီခေါ် မီးထွန်းပွဲတော်သည် မြန်မာနိုင်ငံတွင် သီတင်းကျွတ်မီးထွန်းပွဲတော်နှင့် တန်ဆောင်တိုင် မီးထွန်းပွဲတော်တို့၏ ကြားကာလတွင် ကျရောက်ပြီး ဘာသာရေး၊ တရားဓမ္မရေး၊ အမျိုးသားရေးပွဲတော်ဖြစ်သည်။ ပွဲတော်၏ အနှစ်သာရအားဖြင့် “အဝိဇ္ဇာ” အမိုက်မှောင်ကို ပယ်ခွင်း၍ “ဝိဇ္ဇာ” ဉာဏ်အလင်းကို အောင်နိုင်ခြင်း၊ “ကဏှ” ခေါ် မကောင်းမှုအင်အားစုကို “ကလျာဏ” ခေါ် ကောင်းမှုအင်အားစုက အနိုင်ရခြင်း၊ “အဓမ္မ” ခေါ် မှားယွင်းသည့်သဘောတရားကို “ဓမ္မ” ခေါ် သစ္စာတရားက အောင်နိုင်ခြင်းတို့၏ အထိမ်းအမှတ်ပင်ဖြစ်သည်။
