သူ့ရဲ့မြန်မာနာမည်က ဆန်းဆန်းလေး။ ခင်လေးဆတ်ဆတ်တုန်တဲ့။ ခွာပြာလို့လည်းခေါ်ကြတယ်။
ဘိုလိုဆိုရင်တော့ Purple Wreath, Blue Bird Vineပေါ့။ ခရမ်းရောင်နွယ်ပင်တွေဖြစ်ပြီးတော့ အိမ်တွေမှာစိုက်ရင် အင်မတန်ကိုလှပါတယ်။ ကျနော်က မန္တလေးကမို့ ဒီပန်းတွေကို ခဏခဏမြင်ဖူးတယ်။ မျိုးစေ့တွေလည်း အလွယ်တကူဝယ်လို့ ရပါတယ်။
သူ့ရဲ့အဓိပ္ပါယ်က မျှော်လင့်ချက်တဲ့။
ဘာကြောင့်လဲဆိုတော့ ဒီပုံပြင်လေးကြောင့်ပေါ့။
တောင်အမေရိကမှာရှိတဲ့ ရွာလေးတစ်ရွာမှာ ခွာပြာတွေကို သဘောကျတဲ့ မိန်းကလေးတစ်ယောက်နေထိုင်တယ်။ အဲဒီမိန်းကလေးက အမြဲနေမကောင်းနေတာဆိုပေမယ့် ခွာပြာတွေကို မြင်တဲ့အခါမှာတော့ အားအင်တွေပြည့်ဝလာသလို ခံစားရတယ်တဲ့။
တစ်နေ့ကျတော့ သူတို့ရွာကြီးမှာ မုန်တိုင်းတစ်ခုတိုက်တော့ အိမ်တွေအကုန်ပါကုန်တာပေါ့။ ဒါပေမယ့် ကောင်မလေးကတော့ ခွာပြာပင်ကို ဖက်ထားရင်းအသက်ရှင်သန်ကျန်ရစ်ခဲ့တယ်တဲ့။
ဒါကြောင့် မုန်တိုင်းပြီးသွားတဲ့အခါ ခွာပြာပန်းပင်တွေကိုကြည့်ရင်း ရွာသားတွေက သူတို့ဘဝကို လက်မလျှော့ဘဲ ပြန်လည်တည်ဆောက်ဖို့ ဆုံးဖြတ်လိုက်ကြတယ်တဲ့။
ဒါ့အပြင် ခြောက်သွေ့တဲ့နေရာမှာတောင် ရှင်သန်နိုင်တာမို့ “အခက်အခဲကိုသည်းခံနိုင်စွမ်း” ဆိုတဲ့ အဓိပ္ပါယ်လည်းရှိတယ်။ တစ်ယောက်ယောက်ကို ပေးတဲ့အခါမှာတော့ “မင်းနောက်မှာ ငါရှိတယ်”ဆိုတဲ့ အဓိပ္ပါယ်နဲ့ ပေးကြသတဲ့။
