မြောက်ကိုရီးယားနိုင်ငံခြားရေးဝန်ကြီး ရုရှားနိုင်ငံရောက်ရှိနေ

နိုင်ငံတကာ၊ အောက်တိုဘာ ၃၀

ရုရှား-ယူကရိန်း စစ်ပွဲ အန္တရာယ်ရှိတဲ့အချိုးအကွေ့တစ်ခုကို ရောက်ရှိလာစဉ်အတွင်း မြောက်ကိုရီးယားနိုင်ငံခြား ရေးဝန်ကြီး ချိုဆန်ဟွေး အင်္ဂါနေ့ (အောက်တိုဘာ ၂၉ ရက်နေ့) က ရုရှားနိုင်ငံကို ရောက်ရှိလာပါတယ်။

မြောက်ကိုရီးယားတပ်ဖွဲ့တွေ နယ်စပ်ဖြတ်ကျော်ဝင်ရောက်လာတယ်ဆိုရင် ယူကရိန်းနိုင်ငံအနေနဲ့ ပြန်လည် တိုက်ခိုက်ရမှာဖြစ်ကြောင်း အမေရိကန်သမ္မတဂျိုးဘိုင်ဒန်က ပြောပါတယ်။

မြောက်ကိုရီးယားတပ်ဖွဲ့ဝင်ထောင်ပေါင်းများစွာ ရှေ့တန်းစစ်မျက်နှာဘက်ကို ချီတက်နေတဲ့အတွက် ယူကရိ်န်း အစိုးရအနေနဲ့ နောက်ထပ်လက်နက်အကူအညီတွေ ပိုမိုတောင်းခံနေရသလို ရန်သူနဲ့ ရင်ဆိုင်နေရတဲ့ ယူကရိန်း တပ်ဖွဲ့ဝင်တွေအတွက် နိုင်ငံတကာအစီအစဉ်တစ်ခုကိုလည်း တောင်းဆိုနေကြောင်း နေတိုးအဖွဲ့က တနင်္လာနေ့ က ပြောပါတယ်။

ယူကရိန်းတပ်ဖွဲ့ဝင်တွေ သြဂုတ်လမှာ ထိုးစစ်ဆင်တိုက်ခိုက်ပြီး ထိန်းချုပ်ထားတဲ့ ရုရှားနိုင်ငံ ကာ့စ်ခ်ဒေသမှာ မြောက်ကိုရီးယားတပ်ဖွဲ့ဝင်တွေရောက်ရှိ နေတယ်ဆိုတာကို ပင်တဂွန်စစ်ဌာနချုပ်က အင်္ဂါနေ့က အတည်ပြု ပြောကြားခဲ့ပါတယ်။

မြောက်ကိုရီးယားတပ်ဖွဲ့ဝင် အင်အား ၂၀၀၀ ကျော်ဟာ အဲဒီနယ်စပ်ဒေသဘက်ကို ချီတက်လာတယ်လို့လည်း နေတိုးအဖွဲ့က ပြောပါတယ်။

မြောက်ကိုရီးယားတပ်ဖွဲ့ဝင်တွေ စစ်ပွဲမှာဝင်ရောက်တိုက်ခိုက်လာလို့ ယူကရိန်းက ပြန်လည်တိုက်ခိုက်ခဲ့ရင် တရားမျှတတဲ့စစ်ပွဲဖြစ်ပြီး အဲဒီလိုအခြေအနေဆိုက်ရောက်လာခဲ့ရင် အမေရိကန်အနေနဲ့ ၎င်းတို့လက်နက်တွေ ကို ယူကကရိန်းအသုံးပြုနေတာနဲ့ ပတ်သက်ပြီး နောက်ထပ်တားဆီးကန့်သတ်တာတွေ လုပ်ဆောင်တော့မှာ မ ဟုတ်ကြောင်း အမေရိကန်ပြည်ထောင်စုက ပြောပါတယ်။

၁၉၅၀-၁၉၅၃ ကိုရီးယားစစ်ပွဲဖြစ်ပွားပြီးနောက် နျူကလီးယားပိုင်ဆိုင်တဲ့ မြောက်ကိုရီးယားနဲ့ စစ်မက်ဖြစ်ပွား မယ့်အန္တရာယ်ကို ဆက်လက်ရင်ဆိုင်နေရဆဲဖြစ်တဲ့ တောင်ကိုရီးယားနိုင်ငံကလည်း မြောက်ကိုရီးယားတပ်ဖွဲ့ဝင် တွေ ရုရှားမှာ တပ်ဖြန့်ချထားတာကို ပြစ်တင်ရှုတ်ချလိုက်ပါတယ်။

အပြန်အလှန်အားဖြင့် ရုရှားအစိုးရက မြောက်ကိုရီးယားကို ဘာတွေ ပြန်လည်ထောက်ပံ့ပေးမလဲဆိုတာကို တောင်ကိုရီးယားအာဏာပိုင်တွေက စိုးရိမ်နေပါတယ်။ ရုရှားအစိုးရဟာ မြောက်ကိုရီးယားသူလျှိုဂြိုဟ်တုလုပ်ငန်းအတွက် နည်းပညာအကူအညီတွေကို ဆက်လက် ထောက်ပံ့နေကြောင်း တောင်ကိုရီးယားအမတ်တွေက ပြောပါတယ်။

မြောက်ကိုရီးယားက ရုရှားကို တာတိုပစ်ပဲ့ထိန်းဒုံးကျည်တွေ၊ အမြောက်ကျည်တွေနဲ့ တခြားလက်နက်တွေ လ ပေါင်းများစွာကြာအောင် ထောက်ပံ့နေဆဲဖြစ်ကြောင်း အမေရိကန်၊ တောင်ကိုရီးယားနဲ့ ယူကရိန်း အာဏာပိုင်တွေက ပြောပါတယ်။

Ref: North Korea and Russia Send Political Shockwaves with Ukraine War Moves

#centralnewsnaypyitaw