ဘာစီလိုနာ ကစားသမားများ လှောင်ပြောင်ခံရမှု စစ်ဆေးမည်
-------------------
အောက်တိုဘာ ၂၆ ရက်နေ့က ကစားခဲ့တဲ့ ရီးရဲလ်အသင်းနဲ့ လာလီဂါပွဲစဉ်မှာ ယာမယ်အပါအဝင် ဘာစီလိုနာ ကစားသမားတွေ လူမျိုးရေးခွဲခြားလှောင်ပြောင်ခံရတာကို စုံစမ်းစစ်ဆေးတာတွေ ပြုလုပ်သွားမယ်လို့ သိရပါ တယ်။ ဘာစီလိုနာအသင်းက ရီးရဲလ်အသင်းကို ၄ ဂိုးပြတ်နဲ့အနိုင်ရတဲ့ပွဲမှာ အသက် ၁၇ နှစ်အရွယ် ဘာစီလိုနာ ကြယ်ပွင့် ယာမယ်အပါအဝင် ဘာစီလိုနာကစားသမားအချို့ကို ပစ်မှတ်ထားလှောင်ပြောင်ခံရမှုတွေ ရှိခဲ့တယ်လို့ သိရပြီးနောက် အခုလို စုံစမ်းစစ်ဆေးဖို့ ပြုလုပ်လာခဲ့ကြတာပါ။
စပိန်အားကစားတရားရုံးကလည်း ဒီဖြစ်ရပ်ကို ရှုတ်ချခဲ့ပြီး ဒီလိုလှောင်ပြောင်ခံရမှုနဲ့ ပတ်သက်လို့ အောက်တိုဘာ ၂၈ ရက်မှာ တွေ့ဆုံဆွေးနွေးသွားမယ်လို့ ဆိုပါတယ်။ စပိန်အစိုးရ၊ လာလီဂါနဲ့ ရီးရဲလ်မက်ဒရစ်အသင်းတွေကလည်း အခုလိုမျိုး ကစားသမားတွေ လူမျိုးရေး ခွဲခြားမှုနဲ့ ရင်ဆိုင်ခဲ့ရတဲ့အပေါ် စုံစမ်းမှုတွေ အတူပူးပေါင်းလုပ်ဆောင်သွားမယ်လို့ ထုတ်ပြန်ထားပါတယ်။
ယာမယ် အပါအဝင် အသင်းရဲ့ ကစားသမားတွေ လူမျိုးရေးခွဲခြားလှောင်ပြောင်ခံရမှုနဲ့ပတ်သက်လို့ ဘာစီလိုနာအသင်း ဘက်က တစ်စုံတစ်ရာ ပြောကြားတာမျိုးတော့ မရှိသေးပါဘူး။ ရီးရဲလ်အသင်းတောင်ပံတိုက်စစ်မှူး ဗီနီစီးယက်စ် ကတော့ ဒီသတင်း ထွက်ပေါ်လာပြီးပြီးချင်းမှာပဲ လူမျိူးရေးခွဲခြားမှုတွေကို ရှုတ်ချသလို ဘာစီလိုနာ ကစားသမား တွေဘက်က အပြည့်အဝရပ်တည်သွားမယ်လို့ သူ့ရဲ့လူမှုကွန်ရက်မှာ ရေးသားခဲ့ပါတယ်။
