နိုင်ပွဲနှင့်ထိုက်တန်သည့် ကစားပုံဖြစ်ကြောင်း ဖလစ်ခ် ချီးကျူး
-------------------
အိမ်ကွင်းမှာ ဘိုင်ယန်မြူးနစ်အသင်းကို ဂိုးပြတ်အနိုင်ရခဲ့တဲ့ပွဲက အသင်းရဲ့ကစားပုံက နိုင်ပွဲနဲ့ထိုက်တန်တဲ့ ကစားပုံဖြစ်ခဲ့တယ်လို့ ဘာစီလိုနာနည်းပြ ဟန်ဆီဖလစ်ခ်က ပွဲအပြီးမှာပြောသွားခဲ့ပါတယ်။ ဘာစီလိုနာအသင်း ဟာ ဗုဒ္ဓဟူးညက ကစားခဲ့တဲ့ ချန်ပီယံလိဂ်ပွဲစဉ်မှာ ဘိုင်ယန်မြူးနစ်အသင်းကို တောင်ပံတိုက်စစ်မှူး ရာဖင်ဟာရဲ့ ဟက်ထရစ်သွင်းဂိုးအပါအဝင် ၄ ဂိုး-၁ ဂိုးဆိုတဲ့ရလဒ်နဲ့ အနိုင်ရခဲ့တာဖြစ်ပါတယ်။
ပြောင်းလဲလိုက်တဲ့ ချန်ပီယံလိဂ် ရဲ့ ပုံစံသစ်အရ ပွဲစဉ်တိုင်းက အနိုင်ရဖို့အရေးကြီးတာကြောင့် အခုပွဲမှာရခဲ့တဲ့ ၃ မှတ်က အဖိုးတန်သလို အသင်း ကစားပုံကလည်း တော်တော်လေးကို ကောင်းခဲ့ပါတယ်လို့ ပွဲအပြီးမှာ နည်းပြ ဖလစ်ခ်က ပြောသွားခဲ့ပါတယ်။
အခုပွဲအနိုင်ရခဲ့တဲ့အတွက် ဘာစီလိုနာအသင်းဟာ ချန်ပီယံလိဂ် ၃ ပွဲကစားပြီးချိန်မှာ ရမှတ် ၆ မှတ်နဲ့ အမှတ်ပေး ဇယားအဆင့်-၁၀ နေရာမှာ ရပ်တည်နေပြီး ၂ ပွဲဆက်ရှုံးပွဲကြုံခဲ့တဲ့ ဘိုင်ယန်မြူးနစ်အသင်းကတော့ ရမှတ် ၃ မှတ် သာ ရထားပြီး အဆင့်-၂၃ နေရာမှာ ရပ်တည်နေပါတယ်။ အမှတ်ပေးဇယားထိပ်ဆုံး ၈ သင်းသာ ၁၆ သင်းအဆင့် ကို တိုက်ရိုက်တက်ရောက်ခွင့်ရမယ့် အနေအထားမှာ ဘာစီလိုနာရော ဘိုင်ယန်မြူးနစ်အသင်းအတွက်ပါ လက် ကျန်ပွဲစဉ်တွေမှာ အမှားအယွင်းမရှိအောင် ကစားရတော့မှာ ဖြစ်ပါတယ်။
