သီးစုံ ပဲကုလားဟင်း 😋
***********************
(အဟာရပြည့်ပြီး အရသာရှိတဲ့ သီးစုံ ပဲကုလားဟင်း ချက်နည်းကို ဖော်ပြပေးလိုက်ပါတယ်)
ပါ၀င်ပစ္စည်းများ
ကုလားပဲခြမ်း - ထမင်းပေါင်းအိုး ဆန်ချင်ခွက် တခွက်
မကျီးသီးမှည့် - ကွမ်းသီးဆံလုံးလောက်
ပျဉ်းတော်သိမ်းရွက် - အခက်ကြီးကြီး ၂ခက်
အာလူး - အနေတော် ၃လုံး
ခရမ်းသီး - အလုံးကြီးကြီး တလုံး
ပန်းဂေါ်ဖီ - အခက်ကြီးကြီး ၃ခက်
ပဲသီး - ၁၀တောင့်ခန့်
မုံလာဥနီ - ဥကြီးကြီး တဥ
ဆား - လက်ဖက်ရည်ဇွန်း တဇွန်း
ငါးငံပြာရည် - ထမင်းစားဇွန်း ၃ဇွန်း
အရသာမှုန့် - လက်ဖက်ရည်ဇွန်း တဇွန်း
နနွင်းမှုန့် - လက်ဖက်ရည်ဇွန်း တဇွန်း (ပဲပြုပ်ထဲနှင့်ဆီသတ်ရာတွင် သုံးရန်)
ကြက်သွန်နီ - အနေတော် တခြမ်း
ကြက်သွန်ဖြူ - အမွှာကြီးကြီး ၂မွှာ
ချင်း - လက်တဆစ်ရဲ့တ၀က်
ငရုတ်သီးအရောင်တင်မှုန့် - လက်ဖက်ရည်ဇွန်း တ၀က်သာသာ
ကုလားလေးမဆလာ - တထုတ်
ဆီ - ထမင်းစားဇွန်း ၃ဇွန်း
ပြင်ဆင်ပုံ
ကုလားပဲဆန်ကို ရေဆေးပြီး ရေမြုပ်အောင်ထည့် နနွင်းမှုန့် အနည်းငယ်ထည့်ပြီး ပဲကိုမနူးတနူး ပဲအခြမ်းလိုက် အနေအထားမပျက်အောင် ပြုပ်ပြီးထားပါ
မကျီးသီးမှည့်ကို ရေတထပ်ဆေးပြီး ရေမြုပ်အောင် ထည့်ကာ ရေစိမ်ထားပါ
အသီးအရွက်များနှင့် အာလူးကို သင့်သလိုလှီးကာ ရေဆေးထားပါ
ကြက်သွန်ဖြူ နီ ချင်းတို့ကို အခွံခွာပြီး ရေဆေးကာ ငရုတ်သီးမှုန့်တို့နဲ့ရောပြီး ထောင်းထားပါ
အားလုံးအဆင်သင့်ဖြစ်တာနဲ့ ဒယ်အိုးတလုံးကို အပူပေးပြီး ဆီထည့်ပါ ဆီပူလာတာနဲ့ နနွင်းမှုန့်ထည့်ကာ ငရုတ်သီးထောင်းကိုထည့်ပြီး မွှေးလာအောင် ဆီသတ်ပေးပါ
ဆီသတ်နံ့မွှေးလာတာနဲ့ ပျဉ်းတော်သိမ်းရွက်များကို ထည့်ပြီးဆီသတ်ပါ
ပြီးတာနဲ့ ဟင်းချက်ရန် ပြင်ထားသောအာလူးနှင့် အသီးအရွက်များ ဆား ငံပြာရည် အရသာမှုန့်တို့ကိုထည့်မွှေပြီး ဆီသတ်ပါ
ဆီသတ်နံ့ မွှေးလာတာနဲ့ မီးပိတ်ထားပေးပါ
အသီးအရွက်များ ဆီသတ်ပြီးတာနဲ့ ပြုပ်ထားသော ပဲအိုးထဲကို ပြောင်းထည့်ပြီး ရေလိုသလောက်ထည့်ကာ ပွက်ပွက်ဆူအောင် တည်ပေးပါ
ရေပွက်ပွက် ဆူလာတာနဲ့ မာနေသော အသီးအရွက်များ နူးအောင် တည်ပေးကာ ရေစိမ်ထားသော မကျည်းမှည့်ကို လက်နဲ့နယ်ဖျော်ပြီး မကျည်းရည် ထည့်ပေးပါ
ဟင်းရည်ပွက်ပွက်ဆူပါက အရသာမြည်းပြီး လိုသလိုပြင်ကာ ကုလားလေးမဆလာကို ထည့်ပြီးမွှေပေးပါ
အသီးအရွက်များ နူးလာတာနဲ့မဆလာနံ့ မွှေးနေသော သီးစုံပဲဟင်း အရည်သောက်ဆမ်းကို သုံးဆောင်နိူင်ပါပြီ။
