ရွှေရောင်းဝယ်ခြင်းကို အရေးကြီးဝန်ဆောင်မှုအဖြစ်သတ်မှတ်
---------------------------------------
ရွှေရောင်းဝယ်ခြင်းလုပ်ငန်းကို အရေးကြီးဝန်ဆောင်မှုအဖြစ် သတ်မှတ်လိုက်တယ်လို့ သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာနက အောက်တိုဘာ၂၅ရက် ရက်စွဲနဲ့ အမိန့်ကြော်ငြာစာ ထုတ်ပြန်ပါတယ်။
အရေးကြီးကုန်စည်နှင့်ဝန်ဆောင်မှုဥပဒေ ပုဒ်မ၄၊ ပုဒ်မခွဲ(ဂ)အရ အခုလို သတ်မှတ်လိုက်တာဖြစ်တယ်လို့ အမိန့်ကြော်ငြာစာမှာ ဖော်ပြ
ထားပါတယ်။
ရွှေရောင်းဝယ်မှုနဲ့ပတ်သက်ပြီး တားမြစ်မိန့်၊ စည်းမျဉ်းသတ်မှတ်မိန့်၊ ကြီးကြပ်မိန့်၊ ကာကွယ်မိန့်နဲ့ လိုအပ်သလို ဆောင်ရွက်စေတဲ့ အမိန့်ထုတ်ပြန်နိုင်ခွင့်ကို သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာနကို အပ်နှင်းလိုက်တဲ့ အမိန့်ကြော်ငြာစာကိုလည်း ပြည်ထောင်စုအစိုးရအဖွဲ့က အောက်တိုဘာ၂၄ရက် ရက်စွဲနဲ့ ထုတ်ပြန်ထားပြီးဖြစ်ပါတယ်။
ဒါ့အပြင် ရွှေရည်ညွှန်းဈေးသတ်မှတ်ရေးကော်မတီကိုလည်း ဖွဲ့စည်းလိုက်ပြီဖြစ်တယ်လို့ ပြည်ထောင်စုအစိုးရအဖွဲ့က အောက်တိုဘာ၂၄ရက် ရက်စွဲနဲ့ အမိန့်ကြော်ငြာစာထုတ်ပြန်ခဲ့ပြီး ဖြစ်ပါတယ်။
