ဆော်ဒီလက်ရွေးစင်အသင်းနှင့် မန်ချီနီ လမ်းခွဲ
---------------------
ဆော်ဒီလက်ရွေးစင်အသင်းဟာ အသင်းရဲ့နည်းပြ မန်ချီနီနဲ့ နှစ်ဦးသဘောတူလမ်းခွဲလိုက်ပြီလို့ အောက်တိုဘာလ (၂၄)ရက်မှာ တရားဝင်ကြေညာခဲ့ပါတယ်။ နောက်ဆုံးကစားခဲ့တဲ့ ပွဲစဉ်တွေမှာ ရလဒ်ကောင်း ရဖို့အတွက် ရုန်းကန် ခဲ့ရပြီးနောက် ဆော်ဒီလက်ရွေးစင်အသင်းဟာ နည်းပြမန်ချီနီနဲ့ လမ်းခွဲဖို့အတွက် ဆုံးဖြတ်ခဲ့တာပါ။ အသက်(၅၉) နှစ်အရွယ်ရှိနေပြီဖြစ်တဲ့ မန်ချီနီဟာ ဆော်ဒီလက်ရွေးစင်အသင်းကို ပြီးခဲ့တဲ့နှစ် ဩဂုတ်လမှ နည်းပြအဖြစ် တာဝန်ယူခဲ့တာဖြစ်ပေမယ့် နောက်ပိုင်းပွဲစဉ်တွေမှာ ရလဒ်ကောင်းရဖို့အတွက် ရုန်းကန်ခဲ့ရတာ ဖြစ်ပါတယ်။
နည်းပြမန်ချီနီလက်ထက်မှာ ဆော်ဒီလက်ရွေးစင်အသင်းဟာ ပြီးခဲ့တဲ့အာရှဖလားပြိုင်ပွဲမှာလည်း တောင်ကိုရီးယား အသင်းကို ပင်နယ်တီနဲ့ရှုံးနိမ့်ပြီး (၁၆)သင်းရှုံးထွက်အဆင့်မှာတင် ပြိုင်ပွဲကနေ ထွက်ခွာခဲ့ရပါတယ်။ အခုအချိန်မှာ (၂၀၂၆)ကမ္ဘာ့ဖလားဝင်ခွင့်ရဖို့အတွက် ကြိုးစားနေတဲ့ ဆော်ဒီအသင်းဟာ အုပ်စုပွဲစဉ်(၄)ပွဲကစားပြီးချိန်မှာ (၁)ပွဲနိုင်၊ (၂)ပွဲသရေ၊ (၁)ပွဲရှုံး၊ ရမှတ်(၅)မှတ်နဲ့အတူ အမှတ်ပေးဇယားရဲ့ အဆင့် (၄)နေရာမှာ ရပ်တည်နေ ပါတယ်။
