ခေတ်စနစ်နဲ့ အလုံးအထည်
ကြေးစားဘောက်ဆင်မှာ ကိုယ်အလေးချိန် (၂၀၀) ပေါင်ကျော်ရင် ဟဲဗီးဝိတ်တန်းလို့ အကျုံးဝင်ပါတယ်။ Sonny Liston ကို အလဲထိုးတဲ့ ပထမပွဲမှာ Muhammad Ali က (၂၁၀) ပေါင်တဲ့။ အကောင်းဆုံးအချိန်မှာလည်း Muhammad Ali က (၂၂၀) ပေါင်လောက်ပါပဲ။ အရပ်က (၆) ပေ (၃) လက်မပဲ ရှိတာပါ။ ဒါပေမယ့် George Foreman ၊ Joe Frazier ၊ Sonny Liston နဲ့ Floyd Patterson တို့လို ခေတ်ပြိုင်တွေကို ကြည့်ရင်လည်း အခုခေတ်လူတွေလို အကောင်မထွားဘူး။ အဲဒီခေတ်တုန်းက အရပ် (၆) ပေ (၅) လက်မရှိရင် အကောင်ပဲ။
Mike Tyson တို့ခေတ်ကို သွားရအောင်။ သူလည်း အရပ် (၅) ပေ (၁ဝ) လက်မပဲရှိတယ်။ Evander Holyfield နဲ့ Lennox Lewis တို့လို ခေတ်ပြိုင်တွေနဲ့စာရင် အရပ်ပုတယ်။ ဒါပေမဲ့ အလုံးအထည်က ပြောလောက်အောင် မကွာပါဘူး။ Mike Tyson ရဲ့ အကောင်းဆုံးအချိန်မှာ ကိုယ်အလေးချိန်က (၂၂၁) ပေါင်ပါပဲ။
ပထမပွဲမှာ Mike Tyson ကတောင် Evander Holyfield ထက် အကောင်ပိုကြီးတယ်။ (နားကိုက်တာက ဒုတိယပွဲပါ) Lennox Lewis က Mike Tyson ထက် (၁၅) ပေါင်မက ပိုကြီးတယ်။ သူတို့သုံးယောက်မှာ Lennox Lewis က အထွားဆုံးဖြစ်ပြီး လက်တံလည်း အရှည်ဆုံးပါ။ ကိုယ်အလေးချိန်က (၂၄၀/၂၅၀) ပေါင်ရှိတယ်။ (၆) ပေ (၅) လက်မဆိုတဲ့ အရပ်က နည်းတဲ့ ပမာဏမှ မဟုတ်တာပဲ။
အခုပုံထဲမှာ Mike Tyson နဲ့ Tyson Fury တို့ကို ယှဉ်ကြည့်ပါ။ ဝိတ်တန်းတူပေမယ့် အရပ်၊ အလုံးအထည်နဲ့ လက်တံက ဆင်နဲ့ဆိတ်လိုပဲ။ Oleksandr Usyk လည်း အရပ် (၆) ပေ (၃) လက်မပဲ ရှိတယ်။ ကိုယ်အလေးချိန်အရ (၂၂၁) ပေါင်က အမြင့်ဆုံးပဲ။ အရွယ်အစားက Muhammad Ali လောက်ပဲ။ အရင်ခေတ်အတိုင်းဆိုရင် ဒီပမာဏက မဆိုးဘူး။
ဒါပေမယ့် ဒီဘက်ခေတ်မှာ Oleksandr Usyk အကောင်သေးတယ်။ Tyson Fury ၊ Zhilei Zhang နဲ့ Joe Joyce တို့ဆိုရင် လူဘီလူးကြီးတွေပါ။ အခုခေတ်လူတွေက အရင်ခေတ်လူတွေနဲ့စာရင် အရပ်လည်း ပိုရှည်လာတယ်။ ဒီနေ့ခေတ်မှာ ကျန်းမာရေးစနစ်၊ လေ့ကျင့်မှုပုံစံနဲ့ တခြားအချက်တွေကြောင့် ပိုထွားလာတယ်လို့ ယူဆမိပါတယ်။ စာဖတ်သူတွေ ဘေးကင်းပါစေ။

Reference Source - Boxing Scene ၊ ESPN
Photo Credit – Hotboxin' With Mike Tyson
Credit to ကျော်စိုးအောင် (Myanmar Fight Edition)