ပါရီမသန်စွမ်းပြေးခုန်ပစ်ပြိုင်ပွဲအတွက် ဖိတ်ကြားခံရတဲ့ မြန်မာ့လက်ရွေးစင်
-----
ပြင်သစ်နိုင်ငံ ပါရီမြို့မှာ ကျင်းပပြုလုပ်မယ့် ပါရီအိုလံပစ်ပြိုင်ပွဲရဲ့ မသန်စွမ်း ပြေးခုန်ပစ်ပြိုင်ပွဲ အတွက် မြန်မာ့လက်ရွေးစင် ကစားသမား စိုးပေ ဖိတ်ကြားခြင်း ခံထားရပါတယ်။
မောင်စိုးပေရဲ့ လေးနှစ်တာအောင်မြင်မှုမှတ်တမ်းကိုကြည့်ပြီး ကမ္ဘာ့မသန်စွမ်းပြေးခုန်ပစ်အဖွဲချုပ်နဲ့ ကမ္ဘာ့မသန်စွမ်းအားကစားအဖွဲချုပ်တို့က ဝင်ရောက်ယှဉ်ပြိုင်ဖို့ ဖိတ်ကြားခဲ့တာဖြစ်ပါတယ်။
မောင်စိုးပေအနေနဲ့ ပြီးခဲ့တဲ့လေးနှစ်အတွင်း နိုင်ငံတကာပြိုင်ပွဲတွေမှာ ရွှေတံဆိပ် သုံးခု၊ငွေတံဆိပ် တစ်ခုနဲ့ကြေးတံဆိပ်ငါးခု စုစုပေါင်းဆုတံဆိပ်ကိုးခုရရှိခဲ့ပါတယ်။
၂၀၂၄ နွေရာသီမသန်စွမ်းအိုလံပစ်အားကစားပြိုင်ပွဲ( Paris 2024 Paralympic Games)ကို လာမယ့် သြဂုတ် ၂၈ ရက်ကနေ စက်တင်ဘာ ၈ ရက်အထိ ပြင်သစ်နိုင်ငံ၊ ပါရီမြို့မှာ ကျင်းပမှာဖြစ်ပါတယ်။
မောင်စိုးပေကတော့ ကမ္ဘာ့မသန်စွမ်းအားကစားပြိုင်ပွဲအမျိုးသား မီတာ ၁၀၀ နဲ့ မီတာ ၂၀၀ ပြိုင်ပွဲတွေရဲ့ ဆေးအဆင့် (T64) (ဒူးအောက်တစ်ဖက်) မှာ ယှဉ်ပြိုင်ရမှာဖြစ်ပါတယ်။ မောင်စိုးပေအနေနဲ့ပြီးခဲ့တဲ့ (၁၁)ကြိမ်မြောက်နဲ့(၁၂)ကြိမ်မြောက် အာဆီယံမသန်စွမ်းအားကစားပြိုင်ပွဲတွေရဲ့ မီတာ ၁၀၀ နဲ့ မီတာ ၂၀၀ ပြိုင်ပွဲတွေမှာ ရွှေတံဆိပ်သုံးခုနဲ့ငွေတံဆိပ်တစ်ခု၊မီတာ ၄၀၀ မှာ ကြေးတံဆိပ် တစ်ခု၊ မီတာ (၁၀၀×၄)နဲ့ (၄၀၀×၄)မှာ ကြေးတံဆိပ်နှစ်ခုရရှိခဲ့ပါတယ်။
ဒါ့ပြင် တရုတ်နိုင်ငံမှာ ကျင်းပခဲ့တဲ့ (၃)ကြိမ်မြောက် အာရှမသန်စွမ်းအားကစားပြိုင်ပွဲ မီတာ ၁၀၀ နဲ့ မီတာ ၂၀၀ မှာ ကြေးတံဆိပ်နှစ်ခုဆွတ်ခူးခဲ့ပါတယ်။
