တောင်သူတစ်ဦးက ပိုလျှံနေတဲ့ အာလူးသန်းချီကို လိုအပ်နေသူတွေအတွက် လှူဒါန်း
ကနေဒါနိုင်ငံမှ တောင်သူတစ်ဦးဟာ ပိုလျှံနေတဲ့ အာလူးသန်းချီကို လိုအပ်နေသူတွေအတွက် လှူဒါန်းပေးခဲ့ပါတယ်။ မာနီတိုဘာမြို့မှာ နေထိုင်တဲ့တောင်သူ ဟိုဖာဟာ အခုနှစ် အာလူးထွက်ချိန်မှာ အာလူး အလွန်အထွက်တိုးပြီး အလေးချိန် ပေါင် ၁၀ သန်းလောက်အထိ ပိုလျှံနေခဲ့လို့ ကြံရာမရ ဖြစ်ခဲ့ပါတယ်။
အဲဒီနောက်မှာတော့ The Farmlink Project နဲ့ ဆက်သွယ်ပြီး ပိုလျှံနေတဲ့ အာလူးတွေကို လိုအပ်နေသူတွေထံ လှူဒါန်းပေးနိုင်ခဲ့တာပါ။ လွန်ခဲ့တဲ့ ၄ နှစ်မှာ စတင်တည်ထောင်ခဲ့တဲ့ The Farmlink Project ဟာ တောင်သူတွေရဲ့ ပိုလျှံနေတဲ့ သီးနှံတွေကို လိုအပ်နေသူတွေထံ ဖြန့်ဖြူးပေးတဲ့ အဖွဲ့အစည်းပါ။ အမေရိကန်နိုင်ငံနဲ့ မြောက်အမေရိကတိုက်တစ်ဝန်းမှာ ပိုလျှံနေတဲ့ ထွက်ကုန်ပစ္စည်း အလေးချိန် ပေါင်သန်း ၂၂၀ ကို လိုအပ်နေသူတွေထံ ပို့ဆောင်ပေးနိုင်ခဲ့ပြီး အဲဒီပမာဏက အိမ်ထောင်စုတွေအတွက် အစားအစာအနပ်ပေါင်း ၁၈၃ သန်းနဲ့ ညီမျှပါတယ်။
