ကိုယ့်ကို သိပ်ချစ်တဲ့ လူတစ်ယောက်ကို မတွေ့ခဲ့ရင်တော့ လက်ကျန်ဘဝကို တစ်ကိုယ်တည်းပဲ ဖြတ်သန်းဖို့ ပိုသေချာပါတယ်
ကိုယ့်ရဲ့ လွတ်လပ်ခွင့်တွေ ဆန္ဒတွေ အချိန်တွေ အခွင့်အရေးတွေ တချို့တဝက်ကို လက်လွတ်ခံပြီး နှစ်ယောက် တစ်ဘဝကို ဖြတ်သန်းရမယ်ဆိုရင် ကိုယ့်ကို အဆုံးရှုံး မခံနိုင်လောက်အောင် ချစ်တဲ့သူပဲ ဖြစ်သင့်တာပေါ့
အထူးသဖြင့် ကိုယ့်ရဲ့ အရာရာတိုင်းကို မြတ်နိုးတာ
ဘာမှမပြင်ဆင် မခြယ်သထားတဲ့ ကိုယ့်ရဲ့ မျက်နှာပြောင်ရှင်းရှင်းလေးက သူ့မျက်လုံးထဲမှာ ချစ်စရာကောင်းနေမယ်
ကိုယ့် ခန္ဓာကိုယ်ပေါ်က အမာရွတ်လေးတွေ မလှပတဲ့ အစိတ်အပိုင်းတွေ မွေးကတည်းက ဖြစ်တည်လာတဲ့ အသားအရေက အစ ဝက်ခြံဖု သေးသေးလေးတွေ အဆုံး သူနှစ်သက်နေမယ်
ကိုယ့်ရဲ့ ကောင်းမွန်တဲ့ အတွေးအခေါ်တွေ ဖြူစင်တဲ့ စိတ်ထားလေးတွေကို ချစ်တတ်ရင် တခါတလေ စိတ်တို ဒေါသထွက် ရစ်တတ်တာလေးတွေကိုပါ နားလည်ပေးနိုင်လိမ့်မယ်
ကိုယ့်ရဲ့ Bright side ရော Dark side ရော နှစ်ခု ပေါင်းစပ်ပြီးမှ ကိုယ်ဟာ သူ့အတွက် သီးသန့်ဖြစ်တည်လာတဲ့ ဒြပ်ပေါင်းတစ်ခုလို တန်ဖိုးထားတာမျိုးပေါ့
ကောင်းမွန်တဲ့အရာတွေပဲ ရှိမယ်လို့ မျှော်လင့်တာမျိုးထက် ကောင်းတဲ့အရာတွေကို တန်ဖိုးထားပြီး ဆိုးတဲ့အချက်တွေ ရှိခဲ့ရင်လည်း ဘယ်တော့မှ စိတ်မပျက်ဘူးဆိုတဲ့ ချစ်ခြင်းမျိုးနဲ့ပဲ ဘဝထဲကို လာစေချင်တယ်
ကိုယ့်ကို ပိုင်ဆိုင်ထားရလို့ ပျော်ရွှင်နေတဲ့သူရဲ့ ရင်ခွင်ထဲမှာပဲ အချိန်တွေ ကုန်ဆုံးချင်ပါတယ်...။
