ဗီလိန်ဇာတ်ကောင်ကို ပီပြင်စွာ သရုပ်ဆောင်နိုင်တဲ့ မင်းသား အွမ်ကီဂျွန် လက်ထပ်တော့မယ်
မြန်မာပရိသတ်တွေအားပေးနှစ်ခြိုက်ခဲ့တဲ့ The Penthouse စီးရီးတွဲမှာ ဗီလိန်ဇာတ်ကောင် ဂျူဂန်ထယ်အဖြစ် သရုပ်ဆောင်ခဲ့တဲ့ မင်းသား အွမ်ကီဂျွန်ဟာ လက်ထပ်တော့မှာဖြစ်ပါတယ်။ ဒီဇင်ဘာလမှာ လက်ထပ်မှာဖြစ်တယ်ဆိုတာကို သူ့ရဲ့အေဂျင်စီ Your Entertainment က မေလ ၁၃ ရက်နေ့မှာ အတည်ပြုပေးခဲ့တာပါ။
အွမ်ကီဂျွန်ရဲ့သတို့သမီးလောင်းဟာ အနုပညာအသိုင်းအဝိုင်းကမဟုတ်ဘူးလို့ သိရပါတယ်။ မင်္ဂလာပွဲကို သူတို့ရဲ့မိသားစု၊ ဆွေမျိုးတွေ၊ ရင်းနှီးတဲ့မိတ်ဆွေသူငယ်ချင်းတွေနဲ့ သီးသန့်ကျင်းပသွားဖို့ စီစဉ်ထားပါတယ်။ အွမ်ကီဂျွန်ကလည်း ဒီသတင်းကို လက်ရေးစာနဲ့ အင်စတာဂရမ်မှာ ပရိသတ်တွေကို အသိပေးခဲ့ပါတယ်။
"မင်္ဂလာပါ..ကျွန်တော့် အွမ်ကီဂျွန်ပါ
၂၀၂၄ ခုနှစ်စရုံပဲရှိသေးတယ်လို့ ခံစားရပေမဲ့ အခု နွေဦးကုန်ပိုင်းနဲ့ နွေရာသီအစဖြစ်နေပါပြီ။ အားလုံးပဲ ကျန်းမာဖို့ မျှော်လင့်ပါတယ်။ ဒီလောက်အကြာကြီး မင်းသားတစ်ယောက်အဖြစ် ကျွန်တော် ရပ်တည်နိုင်ခဲ့တဲ့ အကြောင်းအရင်းက JEKYLLI (အွမ်ကီဂျွန်ရဲ့ Fancub အမည်) ရဲ့ကျေးဇူးတွေကြောင့်ပါပဲ။ မင်းတို့ရဲ့မယိမ်းယိုင်တဲ့ ချစ်ခြင်းတွေအတွက် အမြဲကျေးဇူးတင်မိပါတယ်။
ကျွန်တော့်ရဲ့ခံစားချက်တွေကို ထုတ်ပြဖို့ အဆင်မပြေတဲ့အတွက် မင်းတို့ရဲ့အချစ်ကိုပဲ ခံယူနေခဲ့ရတာ စိတ်မကောင်းဖြစ်ရပါတယ်။ ကျွန်တော်တို့ ပထမဆုံးတွေ့တဲ့အချိန်တုန်းက မင်းတို့ပျော်ရွှင်နေတာကို မြင်တွေ့ခဲ့ရပါတယ်။ ဒါက ကျွန်တော့်အတွက် ကြီးကျယ်ခမ်းနားတဲ့အချိန်ပါပဲ။
အခု ကျွန်တော် ဒီစာကို ရေးရတဲ့အကြောင်းအရင်းက အရင်ဆုံး JEKYLLI နဲ့ မျှဝေချင်တဲ့ သတင်းရှိလို့ပါ။ ဘဝတစ်သက်တာလက်တွဲဖော်ကို ရှာတာက ကျွန်တော့်အတွက် မဖြစ်လာနိုင်တဲ့အရာလို့ ကျွန်တော် တွေးခဲ့မိတာ။ ဒါပေမဲ့ကြင်နာတတ်ပြီး ကိုယ်ချင်းစာတတ်တဲ့ တစ်စုံတစ်ယောက်နဲ့ တွေ့ဆုံခဲ့မိတယ်။ သူ့ကို လက်ထပ်ပြီးတော့ ဘဝအသစ်စဖို့ ကျွန်တော် စီစဉ်ထားပါတယ်။ ဒီသတင်းကို ကြားပြီးတော့ JEKYLLI တို့ ဘယ်လောက် အံ့အားသင့်သွားမလဲဆိုပြီး ကျွန်တော့် စိတ်ပူမိပါတယ်။
ကျွန်တော့်ရဲ့ချစ်လှစွာသော JEKYLLI...မင်းတို့ရဲ့အားပေးပံ့ပိုးမှုတွေနဲ့ ချစ်ခြင်းမေတ္တာတွေကို ဘယ်တော့မှ မေ့မှာမဟုတ်ပါဘူး။ မင်းတို့ရဲ့ချစ်ခြင်းမေတ္တာတွေကို ပြန်ပေးဆပ်ဖို့ အကောင်းဆုံးလုပ်သွားမှာပါ။ ကျေးဇူးတင်ပါတယ်" လို့ ရေးသားခဲ့တာပါ။
မင်းသားအွမ်ကီဂျွန်က ၁၉၇၆ ခုနှစ်မှာ မွေးဖွားခဲ့ပြီး ၁၉၉၅ ခုနှစ်မှာ Richard III ဇာတ်ကားနဲ့ အနုပညာလောကထဲကို ဝင်ရောက်ခဲ့တာပါ။ အဲ့ဒီကစပြီး သူဟာ Ghost၊ Heart Surgeons ၊ The Penthouse နာမည်ကြီးစီးရီးတော်တော်များများမှာ ပါဝင်ခဲ့ပါတယ်။ လက်ရှိပြသနေတဲ့ “The Escape of the Seven: Resurrection”စီးရီးမှာလည်း ပါဝင်ထားပါတယ်။
