တချို့လူတွေက ဘာလို့ မလွတ်လပ်တဲ့ သူ (RSရှိတဲ့သူ) တွေကို သဘောကျတာလဲ?

ဘယ် literature review မှ မပါဘဲ ကိုယ်တွေးမိတာလေးကိုပဲ ရေးပြမှာမို့ သိပ္ပံနည်းကျလက်တွေ့ပြမှ ကြိုက်တဲ့သူတွေအတွက်တော့ ခြေဖျက်ရခက်မယ့် စာပါ။

လူတချို့က လွတ်လွတ်လပ်လပ် single တွေရှိနေလျက်နဲ့ မလွတ်လပ်တဲ့ အိမ်ထောင်သည်တို့၊ ချစ်သူ၊ရည်းစားရှိတဲ့သူတွေကိုမှ အတင်းရောပြီး ကလူကျီစယ်ကြတာဟာ ဘာကြောင့်လဲ။

လွယ်လွယ်လေးစဉ်းစားကြည့်ရင် ပိုင်ရှင်ရှိတဲ့အရာကို ဘာလို့များ လိုချင်နေမလဲ။ လွတ်လပ်တဲ့ အရာကိုပဲ ယူပြီး ပေါ်ပေါ်ထင်ထင် ချစ်ပြ၊ ကြင်နာပြလို့ မရပေဘူးလား။ မေးစရာပေါ့။

တချို့ လူတွေက မရပါဘူး။ ဘာလို့မရလဲဆို အများစုက commitment လို့ခေါ်တဲ့ တာဝန်ယူမှု၊ အားစိုက်ထုတ်မှုကို မလုပ်ချင်ကြတဲ့သူတွေမို့ပါ။ အဲ့လိုလူတွေက တခြားလူတစ်ယောက်ကို သူတို့ဘဝရဲ့ ဖြေဖျော်စရာ၊ ဖြေဖျောက်စရာအနေနဲ့ပဲ လိုချင်တာမို့ပါ။

လက်တွေ့ကြည့်ရင် ချစ်သူပဲထားထား၊ အိမ်ထောင်ပဲပြုပြု လူအား၊ အချိန်အား၊ ငွေအား၊ စိတ်အား အကုန်စိုက်ရပါတယ်။ မစိုက်ဘဲနဲ့ ဘယ်လိုမှ တည်မြဲတဲ့ ဆက်ဆံရေးတစ်ခုကို တည်ဆောက်လို့ မရပါဘူး။

တချို့ကကြအဲ့လို အားမစိုက်ချင်ဘဲ အပေါ်ယံ ကြည်နူးမှု၊ ပျော်ရွှင်မှုကိုပဲ ခဏတာ ရယူလိုပါတယ်။ သူတို့ပတ်သင်တဲ့သူဆီက ကောင်းတာတွေကိုပဲယူမယ် မကောင်းတာကိုတော့ မယူဘူးဆိုပြီး သိစိတ်၊ မသိစိတ်က ဖြစ်နေတာဖြစ်ပါတယ်။

ဒီတော့ အိမ်ထောင်ရှိပြီးတဲ့သူ ချစ်သူရှိပြီးတဲ့သူတွေနဲ့ ပတ်သက်ရတဲ့အခါ ဒီလူကို အပြည့်အဝတာဝန်ယူဖို့မလိုဘဲ အချိန်မရွေး ထားခဲ့လို့ရတာမို့ တာဝန်ယူမှုဆိုတဲ့ commitment မလိုတော့ပါဘူး။

ဒီလိုလူတွေ ကိုယ့်အနားကို ချဉ်းကပ်လာတဲ့အခါ အထူးသတ်ိထားပြီး နေဖို့လိုပါတယ်။ စမ်းသပ်ချင်ရင် လွယ်ပါတယ်။ သူတို့လိုချင်တဲ့အရာတစ်ခုကို မပေးဘဲထားကြည့်ပါ၊ ဒါမှမဟုတ် commitment လုပ်ဖို့ ပြောကြည့်ပါ သင့်နားကနေ တဖြေးဖြေးခွါသွားပါလိမ့်မယ်။

လောကမှာ လိုချင်တဲ့အခါကြ ပလူးပလဲလုပ်ပြီး၊ လိုချင်တာမရတဲ့အခါကြ မသိသလို ခွါသွားတဲ့သူတွေလောက် ကြောက်စရာကောင်းတာရှိမယ်မထင်ပါဘူး။