ဘရာဇီးလ်တိုက်စစ်မှူး ရော်နယ်လ်ဒို(ဒိုကြီး) ဥရောပကို ဘယ်လိုရောက်လာခဲ့သလဲ
(၁၉၉၃) ခုနှစ် နိုဝင်ဘာလ(၇)ရက်နေ့တွင် ဖြစ်သည်။ အသက်(၁၇)နှစ်အရွယ်သာရှိသေးသော ရော်နယ်ဒို(ဒိုကြီး)သည် သူ၏ကလပ် ခရူဇီယိုအသင်းနှင့် ဘာဟီယာအသင်းတို့ပွဲတွင် ပါဝင်ကစားခဲ့ပြီး ယင်းပွဲကို နယ်သာလန်ကလပ် ပီအက်စ်ဗွီအသင်း၏ ကင်းထောက်တစ်ဦးလည်း လာရောက်ကြည့်ရှုခဲ့သည်။ယင်းပွဲတွင် ခရူဇီယိုအသင်းက (၆-ဝ)ဂိုးဖြင့် ဂိုးပြတ်နိုင်ခဲ့ရာ ရော်နယ်လ်ဒိုက တစ်ဦးတည်း(၅)ဂိုးသွင်းခဲ့သည့်အပြင် ကျန်တစ်ဂိုးကိုပါ အသင်းဖော်တစ်ဦးဂိုးသွင်းနိုင်ရန် သူက ဖန်တီးပေးခဲ့သည်။ယင်းပွဲမှ သူ၏ဟက်ထရစ်ဂိုး(Glut)ကြောင့် တောင်အမေရိကဘောလုံးလိဂ်ပြိုင်ပွဲတွင် ပီလီအပြီး အသက်အငယ်ဆုံး ဟက်ထရစ်သွင်းနိုင်သူအဖြစ် မှတ်တမ်းဝင်ခဲ့သည်။ ယင်းပွဲ ပြီးပြီးချင်း ပီအက်စ်ဗွီအသင်းကင်းထောက်လည်း အချိန်မဖြုန်းနိုင်ဘဲ ဥရောပရှိ နယ်သာလန်ကလပ်အသင်းတာဝန်ရှိသူများထံ အကြောင်းကြားရတော့သည်။"ကျွန်တော်တို့ သူ့ကို ချက်ချင်းခေါ်ယူဖို့လိုအပ်နေပြီ"ဟု သူ၏ ကင်းထောက်သတင်းပေးပို့ချက်တွင်လည်း ရေးသားခဲ့သည်။အခြားသော နာမည်ကြီး ဥရောပအသင်းများက မျက်စိကျပြီးခေါ်ယူသွားမည်ကို စိုးရိမ်ပူပန်စိတ်နှင့် အမြန်ဆုံးခေါ်ယူရန် ၎င်းကင်းထောက်၏ တိုက်တွန်းချက်မှာ မှန်ကန်ခဲ့သည်။ရော်နယ်ဒိုသည် ဥရောပရောက်မလာမီ ဘရာဇီးလ်၌ ခရူဇီယိုအသင်းအတွက် (၄၇)ပွဲပါဝင်ကစားခဲ့ပြီး (၄၄)ဂိုးသွင်းကာ (၁၅)ဂိုးဖန်တီးပေးခဲ့သည်။ယင်းနောက် ပီအက်စ်ဗွီအသင်းတွင် ထွန်းတောက်လာသော ရော်နယ်ဒိုသည် ဘာစီလိုနာ၊အင်တာမီလန်၊ရီးရဲလ်မက်ဒရစ်၊အေစီမီလန်အသင်းတို့၌ ကစားပြီး ဥရောပဘောလုံးလောကတွင် အထင်ရှားဆုံးကစားသမားတစ်ဦးဘဝကို ပိုင်ဆိုင်ခဲ့သည်။
