၃ နှစ်သမီးလေးပြောလို့ အခန်းနံရံကို Scan ဖတ်ချိန်မှာ အံ့အားသင့်စရာ တွေ့ရှိခဲ့
၃ နှစ်သမီးလေးက သူ့အခန်းနံရံထဲမှာ ထူးဆန်းတဲ့သတ္တဝါကြီးတွေ ရှိနေသလို ခံစားရတယ်လို့ ပြောတာကို မယုံကြည်ခဲ့တဲ့ မိဘနှစ်ပါးဟာ အခန်းနံရံကို အပူလှိုင်းပြ ကင်မရာနဲ့ Scan ဖတ်ကြည့်ချိန်မှာတော့ အံ့အားသင့်ခဲ့ရပါတယ်။
အမေရိကန်နိုင်ငံ၊ မြောက်ကာရိုလိုင်းနားပြည်နယ်၊ ချားလော့မြို့မှာ နေထိုင်တဲ့ ၃ နှစ်သမီးလေး ဆေလာကလက်ဟာ သိပ်မကြာသေးခင်ကမှ Monster Inc ဇာတ်ကားကို ကြည့်ထားသူပါ။ သူ့အခန်းနံရံထဲမှာ ထူးဆန်းတဲ့သတ္တဝါတွေကို ရှိနေတယ်လို့ သူ ပြောချိန်မှာ သူ့မိဘတွေက မယုံခဲ့ပါဘူး။ ဒါပေမဲ့ လနဲ့ချီ ပြောနေခဲ့လို့ သတိထားမိချိန်မှာ မိခင်ဖြစ်သူက ပျားတွေရဲ့ တဝီဝီမြည်သံကို ကြားခဲ့ရပါတယ်။
သူတို့က ပိုးမွှားနှိမ်နင်းရေး ကျွမ်းကျင်ပညာရှင်ကို ဆက်သွယ်ခေါ်ယူပြီး စစ်ဆေးခိုင်းခဲ့ရာမှာတော့ (အမေရိကန်နိုင်ငံမှာ ကာကွယ်ထားတဲ့ ပျားမျိုးစိတ်) ဖြစ်နေတာ သိခဲ့ပါတယ်။ အခန်းနံရံကို အပူလှိုင်းပြ ကင်မရာနဲ့ Scan ဖတ်ကြည့်ချိန်မှာတော့ ပျားအကောင်ရေ ၆ သောင်းကျော် စုဖွဲ့နေပြီး ခရစ္စမတ်သစ်ပင်ကြီးတစ်ခုပုံစံ ဖြစ်နေတဲ့ ပျားအုံကြီးကို တွေ့ခဲ့ရတာပါ။
အမေရိကန်နိုင်ငံရဲ့ ဥပဒေအရ ပျားတွေကို ထိခိုက်ပျက်စီးအောင် လုပ်လို့မရတဲ့အတွက် နံရံထဲက ပျားအုံကြီးကို ရွှေ့ပြောင်းဖို့ ကြိုးစားခဲ့ရပါတယ်။ နံရံကို အပေါက်ဖောက်၊ လေစုပ်စက်နဲ့ ပျားတွေကို ဘူးထဲ စုပ်ထည့်ပြီး ရွှေ့ပြောင်းခဲ့ရတာပါ။ ပျားအကောင်ရေ သောင်းချီနဲ့ အလေးချိန် ပေါင် ၁၀၀ ရှိတဲ့ ပျားအုံကြီးကို ရွှေ့ပြောင်းပေးခဲ့ရတာ ဖြစ်ပါတယ်။
Ref: 3-Year-Old Girl Complaining of Monsters in Her Room Was Hearing 60,000 Bees in the Walls
