ကိုယ်တို့အားလုံးက ဘဝမှာ တစ်ယောက်ထက်ပိုတဲ့
ချစ်ရသူတွေကို ဆုံတွေ့ဖူးခဲ့ကြမှာပဲ
တစ်လလောက်ပဲ တွယ်ငြိမိတဲ့ သံယောဇဉ်တွေ
တစ်နှစ်ကျော်လောက် ကြာတဲ့ relationship တွေ
အချိန်တွေ အကြာကြီး နှစ်တွေအများကြီး အတူဖြတ်သန်းခဲ့ဖူးတဲ့ ချစ်ခြင်းတွေနဲ့
ရက်ပိုင်းလောက်ပဲ နှောင်ဖွဲ့မိတဲ့ သဘောကျ နှစ်သက်ခြင်းတွေရောပေါ့
ဘဝကြီးရဲ့ တစ်ထောင့်တစ်နေရာမှာ ဘယ်သူနဲ့ ဆုံတွေ့ခဲ့ပြီး ဘယ်သူ့ကို အတွယ်ငြိခဲ့ဆုံးလဲ ဘယ်သူ့ကို အချစ်ခဲ့ဆုံးလဲဆိုတာ ကိုယ်ကိုယ်တိုင်ကလွဲပြီး ဘယ်သူက ပိုသိမှာတဲ့လဲ
ရေစက်ဆိုတာ ကိုယ်ကမှ နက်နက်ရှိုင်းရှိုင်း မချစ်မိခဲ့ရင် ဒါမှမဟုတ် ...
ကိုယ့်နှလုံးသားကို လှုပ်ခတ်သွားအောင် ဘယ်လိုချစ်ခြင်းမျိုးနဲ့ ဖလှယ်ရမလဲဆိုတာ မသိခဲ့တဲ့ လူတစ်ယောက်နဲ့သာဆိုရင် ဖြတ်သန်းခဲ့ရသမျှက အချိန်ဖြုန်းရုံသက်သက်ပဲလေ
နှစ်တွေအကြာကြီး အတူရှိခဲ့ပြီးမှ ကျောခိုင်းရတဲ့အခါ ရင်ဘတ်ထဲမှာ ခံစားချက်ဗလာနဲ့ ဘာမှမဖြစ်ခဲ့ဖူးသလို နေနိုင်တဲ့ ဆုံတွေ့ခြင်းမျိုး ရှိသလို
ဘဝတစ်ကွေ့မှာ ဖျတ်ကနဲ ဆုံတွေ့ပြီး နှလုံးသားကို လှပ်ကနဲဖြစ်အောင် လှုပ်ရှားဆွဲယူသွားနိုင်တဲ့ စွဲလန်းတမ်းတခြင်းမျိုးလည်း ရှိတတ်တာပဲ
ဘယ်သူ့ကို အချစ်ခဲ့ဆုံးလဲ ကိုယ်ပဲသိပါတယ်
ဘယ်သူ့ကို အပိုင်ဆိုင်ချင်ဆုံးလဲ ကိုယ်ပဲ သိပါတယ်
