တကယ်တော့ လူ့ဘဝလောက် ရွေးချယ်စရာလမ်းတွေ ရှိတာ အခွင့်အရေးရှိတာက လူ့ဘဝပဲ ရှိပါတယ် ။ မင်းအနေနဲ့ ပထမဆုံး လက်ခံထားရမယ့် အချက်က အခက်အခဲမျိုးစုံနဲ့ ကြုံတွေ့ရတတ်တယ်ဆိုတာပါပဲ ။ အခက်အခဲမျိုးစုံကို တွေ့ကြုံခံစားရမှာတင်မကဘူး ။ အခက်အခဲဆိုတာ သူ့ချည်းလာတာမျိုးမဟုတ်ဘဲ အပေါင်းအဖော်နဲ့ လာတာဆိုသလိုပဲ ။ တခြားအခက်အခဲတွေကိုပါ ပါလာတတ်ပါတယ်။ မည်သို့ပင်ဆိုစေ ဘယ်လိုအခက်အခဲမှ ကြောက်စရာမလိုပါ ။ မင်းအနေနဲ့ ကောင်းကောင်းဖြေရှင်းနိုင်ပါတယ် ။
တချို့သော အခက်အခဲတွေက မင်းက တွေးကြောက်နေလို့ ပိုပြီး ခက်ခဲနေတာပါ ။ ဖြေရှင်းရမယ့်ကိစ္စကို ကြောက်ရွံ့နေတာကိုက လွဲချော်မှုပါပဲ ။ ကြောက်သင့်တာကို ကြောက်ရမှာပါ ။ မကြောက်သင့်တာကို ဘာလို့ကြောက်ရမှာလဲ ။ ကြောက်ရွံ့ခြင်းဟာ စိုးရိမ်မှုကို ဖြစ်ပေါ်စေတယ် ။ စိုးရိမ်မှုဟာ ပျော်ရွှင်မှုကို ပျက်ပြားစေပါတယ် ။ ဘယ်လောက်ပဲခက်ခဲပါစေ စိတ်မပျက်ပါနဲ့ ။
စိတ်မပျက်ခြင်းဟာ အခက်အခဲကို ရင်ဆိုင်ကျော်ဖြတ်ဖို့အတွက် ခွန်အားတစ်ခုပါပဲ ။ စိတ်ပျက်တာများလာရင် ငြီးငွေ့တတ်တယ် ။ ငြီးငွေ့ခြင်းက ဘဝကို ပြိုလဲစေတတ်တယ် ။ ပြိုလဲစရာမလိုပါဘူး ။ စိတ်ပျက်အားငယ်နေတာတွေကို ဖယ်ရှားလိုက်ပါ ။ စိတ်ပျက်အားငယ်နေရင် အချိန်တွေကို သိပ်နှမြောဖို့ကောင်းပါတယ် ။
ဘယ်အခြေအနေမှာဖြစ်ဖြစ် မင်းစိတ်မပျက်ပါနဲ့ ၊ ရဲရဲရင့်ရင့်ရင်ဆိုင် ဖြေရှင်းပါ ။ အဆင်ပြေရင် မင်း ပျော်ရမယ် ။ အဆင်မပြေရင် မင်းသင်ခန်းစာရမယ် ။ နောက်ထပ် ဖြေရှင်းဖို့ နည်းစနစ်ရခြင်းဟာ တန်ဖိုးဖြတ်လို့မရတဲ့ အတွေ့အကြုံတွေပါပဲ ။
#ကောင်းပြည့်သော်
