ခြေလေးချောင်းပါ စက်ရုပ်မြင်းကို မိတ်ဆက်
Kawasaki Heavy Industries ကနေ Expo 2025 Osaka ပွဲမှာ CORLEO လို့ခေါ်တဲ့ စက်ရုပ်တစ်ခုကို မိတ်ဆက်ခဲ့ပါတယ်။ ခြေလေးချောင်းပါပြီး စီးနင်းနိုင်တယ်လို့ ဆိုပါတယ်။ ကျွန်တော်တို့ ပါဝါရိန်းဂျားကားတွေထဲကလို စက်ရုပ်တွေစီးရသလိုကြီး စီးလို့ရမယ့်ပုံစံမျိုး (ဒါက မြင်သာအောင်ပြောတာမို့ အမှားပါရင်တော့ ခွင့်လွှတ်ပါ)
ပြီးခဲ့တဲ့ ဧပြီ ၅ ရက်နေ့တုန်းက ကျင်းပခဲ့တဲ့ Osaka-Kansai Expo ပွဲမှာ Kawasaki Heavy Industries ကနေ လူသားတွေစီးနင်းနိုင်တဲ့ ဟိုက်ဒရိုဂျင်စွမ်းအင်သုံး CORLEO စက်ရုပ်ကို ကမ္ဘာ့ပထမဆုံးအကြိမ် မိတ်ဆက်ခဲ့တာပါ။ ဒီစက်ရုပ်က မော်တော်ဆိုင်ကယ်အင်ဂျင်နီယာနည်းပညာနှင့် စက်ရုပ်နည်းပညာ ၂ ခုကို ပေါင်းစပ်ဖန်တီးထားတာပါ။
စက်ရုပ်ခြေထောက်တွေဟာ ချော်မလဲစေတဲ့ ရော်ဘာခွာဒီဇိုင်းဖြစ်ပြီး မြက်ခင်း၊ ကျောက်စရစ်ခင်းလမ်းတွေအပြင် ကြမ်းတမ်းတဲ့ မြေကြီးတွေမှာပါ ပေါ့ပါးသွက်လက်စွာ မောင်းနှင်နိုင်တယ်လို့ဆိုပါတယ်။ သဘာဝပတ်ဝန်းကျင်အတွက်လည်း သဟဇာတဖြစ်စေပြီး စွန့်စားလိုတဲ့ ဝါသနာရှင်တွေအတွက်လည်း စီးနင်းမှုအတွေ့အကြုံအသစ်ကိုလည်း ခံစားရမှာဖြစ်တဲ့အပြင် မသန်စွမ်းသူတွေအတွက်လည်း အဆင်ပြေစေမယ့် ယာဉ်ပုံစံလို့ ကုမ္ပဏီက ဆိုထားပါတယ်။

Event မှာတော့ ထုံးစံအတိုင်း Concept အနေနဲ့ မိတ်ဆက်သွားတာဆိုတော့ အပြင်မှာ တွေ့ရဖို့တော့ အချိန်တစ်ခုအထိ စောင့်ရဦးမှာပါ။